Соли 2019 бо мақсади таъмини уҳдадориҳои иҷтимоии давлат, аз ҷумла барои пардохти саривақтии музди меҳнати кормандони ташкилоту муассисаҳои буҷетӣ 5,3 млрд сомонӣ равона гардидааст.

Қаҳҳорзода Файзиддин Саттор, вазири молияи Ҷумҳурии Тоҷикистон, 13 феврал зимни нишасти хабарӣ бо зикри ин нукта ҳамчунин гуфт, ки барои идрорпулӣ 92,2 млн. сомонӣ, нафақа 2,8 млрд. сомонӣ, ҷубронпулӣ ва кумакпулиҳо дар ҳаҷми умумии 342,0 млн. сомонӣ дар соли сипаришуда, равона шудааст.
  
- Ба соҳаҳои иқтисодии кишвар зиёда аз 23,7 млрд. сомонӣ, аз ҷумла, ба соҳаҳои мақомоти ҳикимият ва идоракунии давлатӣ 1381,7 млн. сомонӣ, соҳаи маориф 4419,2 млн. сомонӣ, тандурустӣ 1803,9 млн. сомонӣ, ҳифзи иҷтимоӣ 3510,6 млн. сомонӣ ва фарҳангу варзиш 947,8 млн. сомонӣ, инчунин ба соҳаҳои хоҷагии манзилию коммуналӣ 1265,1 млн. сомонӣ, комплекси сӯзишворию энергетикӣ 4586,1 млн. сомонӣ, кишоварзӣ 636,9 млн. сомонӣ, саноату сохтмон 193,2 млн. сомонӣ, нақлиёт ва коммуникатсия 1200,5 млн. сомонӣ равона карда шуданд, - гуфт дар идомаи нишаст Қаҳҳорзода Файзиддин Саттор.

Вобаста ба масъалаи қарзи берунаву дохилии кишвар таъкид гардид, ки ҳаҷми умумии қарзи берунаи Ҷумҳурии Тоҷикистон ба ҳолати 1 январи соли 2020 маблағи 2888,4 млн. доллари амрикоӣ ва ҳаҷми умумии қарзи дохилии давлатӣ 6,9 млрд. сомониро ташкил медиҳад, ки мутаносибан ба 35,8 фоиз ва 9,9 фоизи Маҷмӯи маҳсулоти дохилии кишвар баробар мебошанд.