Имрӯз - 30 апрел 2025 ҳайати тими ҷудои кишвар аз Қаҳрамонии ҷудои Осиё, ки дар шаҳри Бангкоки кишвари Тайланд баргузор гардид, бо дастоварди варзишӣ - 7 медал ба Ватан баргашт.

Тавре аз маркази таҳлил ва иттилооти Кумитаи кор бо ҷавонон ва варзиш хабар доданд, варзишгарон ва мураббиёни онҳоро дар Фурӯдгоҳи байналмилалии шаҳри Душанбе роҳбарияти Кумитаи кор бо ҷавонон ва варзиши назди Ҳукумати Ҷумҳурии Тоҷикистон, муовини Раиси шаҳри Душанбе, ҳайати масъулини мактабҳои варзишии ҷумҳуриявӣ ва федератсияҳои варзишӣ, донишҷӯён ва дӯстдорону мухлисони варзиши кишвар гарму самимӣ ва бо суруру шодмонӣ истиқбол гирифтанд.

- “Сари баланди ҳар яки шумо дар мусобиқаҳои сатҳи байналмилалӣ, сарбаландии миллат ва ифтихори кишвар аст. Маҳз дастгириву роҳнамоиҳои падаронаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон аст, ки соҳаи тарбияи ҷисмонӣ ва варзиши кишвар ба яке аз самтҳои афзалиятноки сиёсати иҷтимоии Ҳукумати мамлакат пазируфта шуда, имрӯз мо бо шодмонӣ аз музаффарияту пирӯзии шумо - парчамбардорони далери меҳан истиқбол мекунем.

Натиҷаи ҳамин ғамхориҳо дар самти варзиш аст, ки рӯз аз рӯз обрӯю нуфузи Ватани маҳбубамон дар арсаи байналмилалӣ даҳҳо маротиба нисбати солҳои қаблӣ боло рафта истодааст.” – гуфт Зулфиқор Гулаҳмадзода, раиси Кумитаи кор бо ҷавонон ва варзиши мамлакат зимни пазироӣ.

Ёдовар мешавем, ки дар шаҳри Бангкоки Тайланд рақобатҳои инфиродии Қаҳрамонии ҷудои Осиё ба анҷом расид. Ҷудокорони тоҷик дар ин мусобиқаи бонуфузи осиёӣ 11 нафар ширкат варзида, ба гирифтани 7 медал ноил шуданд.

Дар мусобиқаи мазкур ба Темур Раҳимов (+100 кг) ва Сомон Маҳмадбеков (-81 кг) муяссар шуд, ки ба гирифтани медали нуқра шарафёб гардиданд.

Ҷудокорони дигари кишвари мо Ҷаҳонгир Маҷидов (-100 кг), Абубакр Шеров (-73 кг), Эмомалии Нуралӣ (-66 кг), Обид Ҷебов (-66 кг) ва Муҳаммадсолеҳ Қувватов (-60 кг) ба гирифтани нишонҳои биринҷӣ даст ёфтанд.

Умедҷон Раҷабов (-90 кг) панҷум ва Виктория Киселёва (+78 кг) ҳафтум шуданд. Кароматулло Ҳакимов (-100 кг) ва Кан Александра (-57 кг) бидуни натиҷаи назаррас мағлуб шуданд.
Ҳамзамон маврид ба зикр аст, ки ҳайати ҷудои Тоҷикистон бори аввал дар мусобиқаи даставии Қаҳрамонии ҷудои Осиё ширкат варзида, мақоми панҷумро касб намуд.