Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба симати раиси Шӯрои тарбияи ҷисмонӣ ва варзиши Иттиҳоди Давлатҳои Мустақил барои солҳои 2021-2022 интихоб шуд.

Дар ин бора дафтари матбуотии Кумитаи кор бо ҷавонон ва варзиш иттилоъ дод. 

Ба иттилои манбаъ, интихоби Раҳмонзода дар нишасти фосилавии ин Шӯро дар Федератсияи Русия рӯзи 9-уми сентябр бо қарори умумии аъзои он сурат гирифтааст.

Гуфта мешавад, Кумитаи кор бо ҷавонон ва варзиш ҳамчун ниҳоди ваколатдори давлатӣ дар соли 2021 раёсати се шӯро – Шӯрои кор бо ҷавонони Созмони Ҳамкории Шанхай, Шӯрои кор бо ҷавонони ИДМ ва Шӯрои тарбияи ҷисмонӣ ва варзиши ИДМ-ро ба ӯҳда дорад.