Мутобиқи маълумотҳои оморӣ дар нимсолаи якуми соли 2022 аз ҷониби мақомоти ҳифзи ҳуқуқ ва сохторҳои қудратии Ҷумҳурии Тоҷикистон 12 482 ҷиноятҳои умумӣ (2021 – 13 878) ба қайд гирифта шудааст. Аз ин шумора 384 (2021 - 446) ҷиноят вобаста ба маводи нашъадор мебошад, ки дар муқоиса бо соли 2021 62 ҷиноят ё 13,9 дарсад кам ба қайд гирифта шудааст.

Дар ин бора Ҳабибулло Воҳидзода, директори Агентии назорати маводи нашъаовари назди Президенти Ҷумҳурии Тоҷикистон санаи 5 август зимни нишасти матбуотӣ иттилоъ дод.

Номбурд ҳамчунин қайд кард, ки ҳарчанд ҷинояткорон кам шуда бошанд ҳам, миқдори муомилоти ғайриқонунии маводи нашъаовар зиёд шудааст:

- Дар шаш моҳи соли ҷорӣ дар ҷумҳурӣ аз муомилоти ғайриқонунӣ 2 т 578 кг 145 гр маводи нашъаовар мусодира карда шудааст, ки дар муқоиса бо ҳамин давраи соли 2021 (1 т 695 кг 645 гр) 52,0 дарсад ё 882 кг 500 гр зиёд мебошад.

Тибқи омори расмӣ дар нимсолаи якуми соли 2022 дар ҷумҳурӣ 4437 нафар нашъаманд дар қайд мебошанд, ки 100 (2021 - 109) нафари онро занҳо ташкил медиҳанд. Ин нишондод нисбат ба ҳамин давраи соли 2021 (5003 нафар) 566 нафар ё 11 дарсад коҳиш ёфтааст, - гуфт Ҳабибулло Воҳидзода.

Ҳошим РАҲМАТУЛЛОЕВ, "ҶТ"