Ҷумҳурии Тоҷикистон бо ба даст овардани Истиқлолияти комил ва Ваҳдати миллӣ баробари дигар соҳаҳои ҳаётан муҳим ва калидии кишвар ба эҳёву рушди соҳаи саноат таваҷҷуҳи махсус равона намуда, ҷиҳати бартараф намудани камбудиҳои ҷойдошта дар ин самт тадбирҳои зиёдеро роҳандозӣ намуд.

Ҳар сол дар кишвар сохта ба истифода додани корхонаҳои гуногуни хурду бузурги молистеҳсолкунанда ва таъмин гардидани сокинон бо ҷои кори доимӣ далели рӯ ба рушд будани соҳаи саноати кишвар мебошад. Натиҷаи таваҷҷуҳи пайвастаи Ҳукумати мамлакат ба ин соҳа буд, ки дар се соли охир ҳиссаи соҳаи саноат дар маҷмӯи маҳсулоти дохилӣ аз 15,2 то 17,3 фоиз афзоиш ёфт.

Ахиран низ Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни ироаи Паёми охирини хеш ба Маҷлиси Олии ҷумҳурӣ бо дарназардошти аҳамияти соҳаи саноат дар ҳалли масъалаҳои иқтисодиву иҷтимоӣ ва таъсиси ҷойҳои корӣ пешниҳод намуданд, ки саноатикунонии босуръати кишвар ҳадафи чоруми миллӣ эълон карда шавад.
Ҳангоми эълони ҳадафи чоруми миллӣ, яъне саноатикунонии кишвар Пешвои миллат иброз доштанд: “Вобаста ба ин, зарур аст, ки то соли 2030 ҳиссаи соҳаи саноат дар маҷмӯи маҳсулоти дохилӣ ба 22 фоиз расонида шавад. Барои расидан ба ин мақсад бояд амалишавии барномаҳои соҳавии қабулгардида ва лоиҳаҳои сармоягузорӣ таҳти назорати қатъӣ қарор дода, самаранокӣ ва сифати онҳо таъмин карда шавад. Бинобар ин, роҳбарони вилоятҳо ва шаҳру ноҳияҳо бояд фаъолияти худро доир ба ҷалби сармояи мустақим, бунёди корхонаҳои нави истеҳсолӣ, ба кор андохтани корхонаҳои аз фаъолият бозмонда ва ташкили ҷойҳои корӣ вусъат бахшанд...”.
Имрӯз баробари дигар шаҳру ноҳияҳои мамлакат дар шаҳри Ҳисор низ ба соҳаи саноат таваҷҷуҳи хосса зоҳир гардида, ҷиҳати амалӣ намудани ҳадафи чоруми миллӣ тадбирҳои зиёд ба роҳ монда шуда истодааст.

Айни ҳол дар шаҳри Ҳисор теъдоди умумии корхонаҳои саноатӣ ба ҳолати 1 июни соли ҷорӣ 58 адад буда, асосан дар самти истеҳсол ва коркарди маҳсулоти саноати сабук, нўшокии машруботӣ, маҳсулотҳои нафтӣ, оҳан ва маводҳои сохтмонӣ фаъолият карда истодаанд. Дар ин корхонаҳои саноатӣ 1517 нафар кору фаъолият намуда, ин рақам нисбат ба ҳамин давраи соли 2018, 286 нафар зиёд аст. Корхонаҳои саноатии шаҳр дар моҳҳои январ - майи соли 2019 ба маблағи 80,7 миллион сомонӣ маҳсулот истеҳсол ва коркард намудаанд, ки нисбат ба ҳамин давраи соли гузашта 5 миллиону 697 ҳазор сомонӣ зиёд мебошад.
 
Бино ба иттилои бахши саноат, сохтмон ва нақлиёти МИҲД шаҳри Ҳисор, моҳҳои январ-майи соли 2019 аз ҷониби корхонаҳои саноатии шаҳр ба миқдори 585 тонна нафт, 3521 метри мукааб рег, 19050 метри мукааб регу сангмайда, 4 тонна шири холис, 930 тонна орд, 238,8 тонна сабус, 305,8 тонна нон ва маҳсулоти нонӣ, 13,8 тонна маҳсулоти қаннодӣ, 127,2 тонна равғани растанӣ, 1676,4 декалитр машруботи спиртӣ, 3825 декалитр оби ҷав, 2585 декалитр нӯшокиҳои ташнашикан, 288,46 тонна ришта, 2906 дона либоси мактабӣ, 72,5 ҳазор дона қоғази ташноб, 0,96 метри мукааб маводи чӯбу тахта, 4537 тонна асфалт, 9 адад тойбанд, 2664 метри мукааб кислород, 110 тонна бастабандии равғани растанӣ, 10,5 миллион дона хишти бинокорӣ, 33,5 ҳазор дона хишти хом, 292,8 ҳазор дона хишти сементӣ, 42,8 ҳазор метри тӯлонӣ сақфҳои ороишӣ, 100,9 ҳазор дона бомпўши асбестӣ, 6,62 ҳазор метри тӯлонӣ бомпӯши оҳанӣ, 1986,8 тонна қубурҳои металлӣ, 37 адад мошинаи кишоварзӣ, 17,9 ҳазор метри мураббаъ пенопласт, 14,6 тонна маҳсулоти кабелӣ, 3500 метри мураббаъ симтӯр, 18 адад ядак ва ба маблағи 81,7 ҳазор сомонӣ мебел ва 1,5 миллион сомонӣ маҳсулоти заргарӣ истеҳсол ва коркард гардидааст.

Аз рақамҳои дар боло зикргардида, истеҳсолу коркарди регу сангмайда 14,9 ҳазор метри мукааб, маҳсулоти қаннодӣ 3,3 тонна, машруботи спиртӣ 246,1 декалитр, хишти хом 13,9 ҳазор дона, хишти сементӣ 55,6 ҳазор дона, бомпӯшҳои асбестӣ 100,9 ҳазор дона, бомпўшҳои оҳанӣ 3,6 метри тӯлонӣ, пенопласт 933,6 метри мураббаъ нисбат ба пештара зиёд гардида, инро масъулин натиҷаи таваҷҷуҳи ҳамешагии Ҳукумати мамлакат ба соҳаи саноат маънидод менамоянд.

Корхонаҳои саноатии шаҳр дар панҷ моҳи соли ҷорӣ 38 номгӯи маҳсулот истеҳсол намудаанд, ки назар ба ҳамин давраи соли сипаригардида, 6 номгӯ бештар мебошад. Инчунин як самти аз фаъолият бозмондаи ҶДММ “Импек компания” истихроҷи регу шағал ва коркарди оҳан ҶДММ “Комбинати металлургии тоҷик” ба кор андохта шуда, корхонаи истеҳсоли симҳои сохтмонӣ ҶДММ “Файзи истеъдод”, корхонаи истеҳсоли маҳсулоти қаннодӣ ҶДММ “Малика” ва корхонаи дўзандагии ҶДММ “Нури ирфон” сохтаву мавриди истифода қарор гирифта, 70 ҷойи корӣ таъсис дода шудааст. 

Масъулини мақомоти иҷроияи ҳокимияти давлатии шаҳри Ҳисор эълон гардидани саноатикунонии кишварро чун ҳадафи чоруми миллӣ аз ҷониби Президенти мамлакат муҳтарам Эмомалӣ Раҳмон омили таҳкиму рушди соҳаи саноати ҷумҳурӣ дониста, дар ин росто ҷиҳати бунёди корхонаҳои саноатӣ ва таъсиси ҷойҳои корӣ барои сокинон фаъолияти худро ба роҳ мондаанд.

Ба таъкиди бахши саноат, сохтмон ва нақлиёти шаҳри Ҳисор, соли 2019 дар самти рушди соҳаи саноат ва зиёд намудани ҳаҷми истеҳсоли маҳсулоти саноатӣ, таъсиси ҷойҳои нави корӣ нақшаҳои зиёд таҳрезӣ гардидааст. Аз ҷумла, сохта ба истифода додани корхонаи истеҳсоли коғаз ва маҳсулоти коғазӣ ҶДММ “Коғази Шарора” бо таъсиси 100 ҷойи корӣ, коргоҳи коркарди шир дар назди ҶСК “Авитсенна” бо таъсиси 65 ҷойи корӣ, коргоҳи истеҳсоли бомпўш дар назди ҶДММ “Истеҳсоли қубур ва профили тоҷик” бо иқтидори истеҳсоли  1,5 ҳазор дона дар як рўз  бо таъсиси 25 ҷойи корӣ, коргоҳи истеҳсоли бомпўш аз ҷониби ҶДММ “Анас Одина” бо иқтидори  истеҳсоли ҳазор дона дар як рўз бо таъсиси 15 ҷои корӣ, корхонаи бастабандии ҷуворимака бо иқтидори истеҳсоли 1,5 тонна маҳсулот дар як рўз бо таъсиси беш аз 32 ҷойи корӣ аз ҷониби ҶДММ “Ситаб-агро”, 2 фабрикаи мурғпарварӣ ва дар назди фермаи чорвопарварии ҶДММ “Абдурауф Юсупов” корхонаи истеҳсоли нуриҳои органикӣ бо иқтидори истеҳсоли 35 тонна маҳсулот дар як шабонарўз ва таъсиси 12 ҷойи нави корӣ дар назар аст. Бо бунёд гардидани корхонаҳои мазкур истеҳсоли маҳсулоти саноатӣ дар шаҳр зиёд гардида, дар баробари ин беш аз 250 нафар бо ҷои кор таъмин мегарданд.