11 март дар Китобхонаи миллии Тоҷикистон бахшида ба таҷлили Рӯзи матбуоти тоҷик чорабинии идона бо иштироки васеи рӯзноманигорону аҳли эҷод, устодони риштаи журналистика ва намояндагони як қатор вазорату идораҳо баргузор гардид.

Дар чорабинии мазкур мушовири Бахши ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Масрур Абдуллозода, Вазири фарҳанги Ҷумҳурии Тоҷикистон Зулфия Давлатзода, раиси Иттифоқи журналистони Тоҷикистон Зиннатулло Исмоилзода, муовини вазири маориф ва илми Ҷумҳурии Тоҷикистон Ҷумъахон Файзуллозода ва директори муассисаи давлатии “Академияи воситаҳои ахбори оммаи Тоҷикистон” С. Исматзода иштирок ва суханронӣ намуданд.

Меҳмонон зимни суханронии хеш саҳми кормандони воситаҳои ахбори оммаро дар ташаккули афкори ҷомеа ва пешбурди самтҳои сиёсати давлатии Тоҷикистон муҳим арзёбӣ намуда, кулли рӯзноманигорони кишварро ба Рӯзи матбуоти тоҷик муборакбод намуданд.

Пас аз суханрониҳои шодбошӣ аз ҷониби Вазорати фарҳанги кишвар ва Иттифоқи журналистони Тоҷикистон рӯзноманигорони муваффақу собиқадорони соҳа ва беҳтарин ВАО-и кишвар дар фазои тантанавӣ бахшида ба Рӯзи матбуот бо ҷоизаҳои махсус қадрдонӣ гардиданд.

Дар баробари кормандони дигар нашрияҳои кишвар кормандони рӯзномаи “Ҷавонони Тоҷикистон” низ бо ҷоизаҳои соҳавӣ қадр гардиданд. Аз ҷумла, Гулчеҳра Фозилова, корманди собиқадори рӯзнома бо Ҷоизаи фахрии ба номи устод Лоҳутӣ сарфароз гардид.



Инчунин, Шодихони Назар, сармуҳаррири рӯзномаи “Ҷавонони Тоҷикистон”, Хуршед Шарипов, муовини сармуҳаррири рӯзномаи “Ҷавонони Тоҷикистон”, Беҳрӯз Холмуродов, котиби масъули рӯзномаи “Ҷавонони Тоҷикистон” бо нишони “Аълочии матбуоти Ҷумҳурии Тоҷикистон” ва Нуруллоҳи Ориф, корманди рӯзнома бо нишони “Аълочии фарҳанги Ҷумҳурии Тоҷикистон” қадрдонӣ гардиданд.

Дар баробари ин, рӯзномаи “Ҷавонони Тоҷикистон” барои саҳми муносиб дар рушди журналистикаи кишвар бо Сипосномаҳои Вазорати маориф ва илм ва Вазорати фарҳанги Ҷумҳурии Тоҷикистон сарфароз гардонида шуд.

Қ. МАҲМАДҶОНОВ, “ҶТ”