13-уми ноябр дар Филармонияи давлатии ба номи Акашариф Ҷӯраев маросими ҷамъбастии Фестивали дӯстии ҷавонону варзишгарони шаҳри Душанбе таҳти унвони “Зебоӣ, доноӣ ва тавоноӣ аз варзиш аст!” баргузор гардид.

Дар фестивали мазкур муовини раиси шаҳри Душанбе Муинӣ Мавсума Муинзода, муовини вазири маориф ва илми Ҷумҳурии Тоҷикистон Латофат Назирӣ, муовини якуми раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Назарзода Ризо Шодӣ, сардори Раёсати кор бо ҷавонон ва варзиши шаҳри Душанбе Раҳимзода Шоҳзод Абдулфатоҳ, роҳбарони сохторҳои шаҳрӣ, ректорон ва директорони як қатор донишкадаву донишгоҳҳо, коллеҷу омӯзишгоҳ, муассисаҳои варзишӣ, мураббиёну доварон, устодону донишҷӯён, афсарону сарбозон ва варзишгарони маъруфи кишвар иштирок ва суханронӣ намуданд.

Иттилоъ дода шуд, ки дар доираи Фестивали номбурда аз рӯи 4 намуди варзиш “Шоҳмот”, “Футбол”, “Волейбол” ва “Гӯштини миллӣ” мусобиқа дар 3 марҳила доир гардида, дар натиҷа аз рўи мусобиқаи “Шоҳмот” ҷойи 1-ум насиби дастаи Донишкадаи тарбияи ҷисмонии Тоҷикистон, ҷойи 2-юм насиби дастаи Донишгоҳи давлатии молия ва иқтисоди Тоҷикистон ва ҷойи 3-юм насиби Донишгоҳи технологии Тоҷикистон гардид.

Ҳамчунин, аз рӯи намуди “Гӯштини миллӣ” ҷойи якумро дастаи Донишкадаи тарбияи ҷисмонии Тоҷикистон, ҷойи дуюмро дастаи Донишгоҳи давлатии молия ва иқтисоди Тоҷикистон ва ҷойи сеюмро дастаи Донишгоҳи аграрии Тоҷикистон сазовор шуданд. Аз рӯи намуди варзиши “Футболи хурд” бошад, ҷойи 1-умро дастаи Донишгоҳи техникии Тоҷикистон, ҷойи 2-юмро дастаи Коллеҷи тарбияи ҷисмонии Тоҷикистон ва ба ҷойи 3-юмро дастаҳои Донишгоҳи техникии Тоҷикистон ва Донишкадаи сайёҳӣ соҳибкорӣ ва хизмати Тоҷикистон соҳиб гардиданд.

Аз рӯи намуди “Волейбол байни бонувон” аз миёни 24 дастаи иштирокчӣ дастаҳои хонандагони муассисаҳои таҳсилоти миёнаи умумии ноҳияи Синои шаҳри Душанбе, Донишгоҳи славянии Тоҷикистону Россия ва Донишгоҳи сайёҳӣ, соҳибкорӣ ва хизмати Тоҷикистон бо дастовардҳои назаррас ғолиб дониста шуданд.

Фестивали дӯстии ҷавонону варзишгарони шаҳри Душанбе таҳти унвони “Зебоӣ, доноӣ ва тавоноӣ аз варзиш аст!” аз 27 август то 15 сентябри соли 2020 бо дастгирии мақомоти иҷроияи ҳокимияти давлатии шаҳри Душанбе, таҳти сарпарастии Президенти Федератсияи Футболи Тоҷикистон, муҳтарам Рустами Эмомалӣ дар миёни тамоми муассисаҳои таҳсилоти миёнаи умумӣ, олии касбӣ, миёнаи касбӣ, ибтидоии касбӣ ва маҳаллаҳои ҳудуди шаҳри Душанбе гузаронида шуд.

Дар охири чорабинӣ дастаҳои ғолиб бо медалу ифтихорномаҳо қадрдонӣ шуданд.