Имрӯз дар Китобхонаи миллии Тоҷикистон бахшида ба 111-солагии Рӯзи матбуоти тоҷик чорабинии тантанавӣ доир гардида, дар он Масрур Абдуллозода, мушовири бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, Зулфия Давлатзода, вазири фарҳанги Ҷумҳурии Тоҷикистон, Зиннатуллоҳ Исмоилзода, раиси Иттифоқи журналистони Тоҷикистон, собиқадорони соҳаи матбуот, сармуҳаррирони рӯзномаю маҷаллаҳо ва намояндагони ВАО иштирок намуданд.

Дар ибтидои чорабинӣ Суруди миллӣ садо дода, сипас Зулфия Давлатзода, вазири фарҳанг бо сухани табрикотӣ онро ифтитоҳ намуд. Ӯ зимни баромади хеш иброз дошт, ки Рӯзи матбуоти тоҷик ба чопи нахустин рӯзномаи тоҷикӣ – “Бухорои шариф”, ки шумораи аввалинаш 11 марти соли 1912 интишор гардида, дастраси хонандагон гардида буд, иртибот дорад. Имсол аз чопи ин рӯзнома 111 сол сипарӣ гардид.

Гуфта шуд, ки Рӯзи матбуоти тоҷик аз соли 1994 инҷониб бо ташаббуси Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Тоҷикистон ба таври расмӣ ҷашн гирифта мешавад.

Баъди суханрониҳои ифтитоҳӣ-табрикотӣ дар фазои идона аз ҷониби Вазорати фарҳанги Ҷумҳурии Тоҷикистон ва Иттифоқи журналистони Тоҷикистон ба як зумра рӯзноманигорон унвонҳои “Аълочии фарҳанги Ҷумҳурии Тоҷикистон”, “Аълочии матбуоти Тоҷикистон”, Ҷоизаи ИЖТ ба номи Абулқосим Лоҳутӣ ва ба ВАО-и гуногун диплому ифтихорнома ва сипосномаҳо супорида шуд.

Аз ҷумла, ба Шодихони Назар, сармуҳаррири рӯзномаи “Ҷавонони Тоҷикистон” Сипосномаи Вазорати фарҳанги кишвар ба унвонии рӯзнома барои иштироки фаъолона дар инъикоси рӯйдодҳои муҳимми сиёсӣ, иқтисодӣ ва иҷтимоию фарҳангии мамлакат, таблиғи дастовардҳои Истиқлоли давлатии Тоҷикистон тақдим гардид.

Ҳамчунин Гулчеҳра Фозилова, собиқадори рӯзномаи “Ҷавонони Тоҷикистон” бо мукофотпулии Вазорати фарҳанг қадрдонӣ шуд.