Дар шаш моҳи соли 2018 дар ҷумҳурӣ 12 ҳазору 482 ҷиноят ба ҳисоб гирифта шудааст, ки нисбат ба ҳамин давраи соли гузашта 156 ҷиноят ё ин ки 1,2% кам мебошад.

Дар ин хусус Раҳимзода Рамазон Ҳамро, вазири корҳои дохилии Ҷумҳурии Тоҷикистон, 30 июл, зимни нишасти хабарӣ ба рӯзноманигорон иттилоъ дод.

Ба таъкиди номбурда дар нимсолаи аввал 2202 (2017-2233) ҷинояти вазнин ба қайд гирифта шудааст, ки аз ин ҳисоб одамкушӣ – 47 (2017-49), роҳзанӣ – 19 (2017-23), ғоратгарӣ 108 (2017-77), қасдан расонидани зарари вазнин ба саломатӣ - 66 (2017-60), авбошӣ – 501 (2017- 564), дуздӣ – 2856 (2017-3119) ҳолат ва инчунин 1483 (2017-1408) ҷинояти қаллобӣ ба қайд гирифта шудааст.

Гуфта шуд, ки аз тарафи кормандони ВКД 1136 нафар ҷинояткорони дар ҷустуҷӯбуда дастгир ва 361 нафар шахсони бедаракгашта, маълум карда шуданд.

Дар ҷараёни нишаст ҳамчунин доир ба ҷиноятҳои аз тарафи ноболиғон содир гардида, суханронӣ сурат гирифта, гуфта шуд, ки дар нимсолаи аввали соли ҷорӣ аз ҷониби ноболиғон 555 ҷиноят ба қайд гирифта шудааст, ки ин нисбат ба ҳамин давраи соли гузашта 216 ҳолат зиёд аст.