Довари дараҷаи байналмилаии ФИФА Гулмуроди Саъдулло аз Тоҷикистон бозии даври сеюми марҳилаи интихобии Ҷоми ҷаҳон-2026-ро ҳакамӣ мекунад. Дар ин бора Федератсияи футболи Тоҷикистон хабар медиҳад.

Бино ба иттилои манбаъ Гулмуроди Саъдулло якҷо бо дастааш дар бозии даври интихобии Ҷоми ҷаҳон-2026 дар гурӯҳи “С” бозии дастаҳои мунтахаби Чин ва Арабистони Саудиро, ки 10 сентябр дар шаҳри Даляни Чин баргузор мешавад, ҳакамӣ мекунад.

Ба довари 33-солаи тоҷик дар майдон ҳамватанонаш, ёварони довари ФИФА Ҳасан Каримов ва Вафо Қараев кӯмак мекунанд. Вазифаи довари эҳтиётиро довари ФИФА Насрулло Кабиров иҷро мекунад. Дар VAR Сивакорн Пу-Удом аз Таиланд кор намуда, ёвари VAR – довари дигари таиландӣ Торфонг Сомсинг таъйин шудааст.

Яҳё МАҲМАДНАБИЕВ, “ҶТ”