Зери ин унвон дар шаҳри Хоруғ аксияи вилоятии ҷавонони касбу кори гуногун баргузор гардид.

Дар чорабинӣ муовини раиси Вилояти Мухтори Кӯҳистони Бадахшон Назира Амирбекзода, варзишгарону сарбозону афсарони қисмҳои низомӣ, масъулини Раёсати кор бо ҷавонон ва варзиш, аъзоёни филиали Иттифоқи ҷавонони Тоҷикистон, гирандагони Стипендияи президентӣ, донишҷӯёни Донишгоҳи давлатии Хоруғ ва Коллеҷи тиббии шаҳр иштироку баромад карданд.

Дар ибтидо Н. Амирбекзода ҳозиринро ба муносибати Рӯзи Парчами давлатии Ҷумҳурии Тоҷикистон табрику таҳният гуфта, иброз намуд, ки маҳз бо шарофати сиёсати воқеъбинонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон эҳтирому самимият ба муқаддасоти миллию давлатӣ таҳким ёфта, феълан Парчами тоҷикон дар созмонҳои бонуфузи ҷаҳонӣ, чорабиниву маъракаҳои муҳими гуногун ва дигар ҷойҳо мақоми хосса дорад.

“Дар замони соҳибистиқлоливу ваҳдати комили миллӣ Рӯзи Парчам бо шукӯҳу шаҳомати сазовор таҷлил мегардад. Ҷавонони Тоҷикистон - пайравони асили Пешвои муаззами миллат муҳтарам Эмомалӣ Раҳмон қимату баҳои муқаддасоту арзишҳои миллӣ, таъриху тамаддун ва фарҳанги волои миллатро медоданд ва бо иродаи матин ба онҳо арҷ мегузоранд. Дар ҳақиқат гиромӣ доштани неъматҳои азалии миллат ва дастовардҳои бебаҳои Истиқлолияту ваҳдат масъулияти наслҳои ояндасози Ватанро дучанд намуда, минбаъд ҳам барои ҷавонони боору нанг лозим аст, ки тамоми талошҳоро барои пешрафт, суботу ҳамдилӣ ва ободиву созандагии кишвар равона созанд”, – афзуд, муовини раиси вилоят.

Дар чорабинӣ инчунин мавзӯъҳои “Парчами давлатӣ - ифтихори миллӣ ва рамзи Истиқлолият ”, “Парчам - рамзи давлатдории миллӣ”, "Парчам - рамзи муқаддаси Ҷумҳурии Тоҷикистон”, “Аз таърихи Парчами давлатии Ҷумҳурии Тоҷикистон ” мавриди баррасӣ қарор гирифта, хонандагони муассисаҳои таҳсилоти миёнаи умумии шаҳр бошад, ашъори гуногунро перомуни Парчам қироат намуданд.

Сипас, як қатор ҷавонону варзишгарон бо ифтихорномаҳо мушарраф шуда, муроҷиатномаи ҷашнии ҷавонону варзишгарони вилоят ироа гардид.