Дар Маҷмааи давлатии “Душанбе Плаза”-и шаҳри Душанбе, 19 апрел, ҷаласаи байниидоравӣ оид ба барасии натиҷаҳои тадқиқотҳои мақсаднок дар самти пешгирӣ ва назорати бемориҳои ғайрисироятӣ дар рафти амалисозии “Дурнамои пешгирӣ ва назорати бемориҳои ғайрисироятӣ ва осеббардорӣ дар Ҷумҳурии Тоҷикистон барои солҳои 2013 – 2023” ва “Стратегия оид ба ғизо ва фаъолияти ҷисмонӣ дар Ҷумҳурии Тоҷикистон барои солҳои 2015-2024” баргузор гардид.

Дар ҷаласа Саида Умарзода, муовини аввали вазири тандурустӣ ва ҳифзи иҷтимоии аҳолии Ҷумҳурии Тоҷикистон, Мехта Пратебха ҳамоҳангсози доимии СММ ва Намояндаи доимии СММ дар Ҷумҳурии Тоҷикистон, Игор Поканевич роҳбари Намояндагии Ташкилоти умумиҷаҳонии тандурустӣ дар Ҷумҳурии Тоҷикистон, Доктор Жоао Бреда, роҳбари Департаменти Аврупо оид ба пешгирӣ ва назорати бемориҳои ғайрисироятии Ташкилоти умумиҷаҳонии тандурустӣ иштирок ва суханронӣ намуданд.

Зимни ҷаласа иштирокчиён вобаста ба масъалаҳои мониторинги бемориҳои ғайрисироятӣ, натиҷаҳои қадамҳои арзёбии бемориҳои ғайрисироятӣ – омилҳои хавф дар аҳолии Ҷумҳурии Тоҷикистон, натиҷаҳои ташаббуси назорати фарбеҳшавии кӯдакона дар Ҷумҳурии Тоҷикистон ва таҳлили вазъи озуқа дар Ҷумҳурии Тоҷикистон бо таваҷҷуҳ ба микроэлементҳо, вазъияти кӯдакони то панҷсола ва занони синну соли репродуктивӣ маъруза ва мулоҳизаронӣ намуданд.

Гуфта шуд, ки дарозии интизорравандаи ҳаёт аз замони таваллуд дар Тоҷикистон 66,2 сол барои мардон ва 73,2 сол барои занонро ташкил медиҳад. Дар ҳоле, ки бемориҳои сироятӣ, маргу мири модару тифл ва кӯдак, норасоии ғизо ҳанӯз ҳам сабаби фавт мебошанд, вале бемориҳои ғайрисироятӣ иллати асосии фавт дар Тоҷикистон аст.