Имрӯз дар шаҳри Душанбе бо иштироки ҳайати намояндагони соҳаи кор бо ҷавонони кишварҳои узви Иттиҳоди Давлатҳои Мустақил ҷаласаи Шурои кор бо ҷавонони кишварҳои узви ИДМ доир гардид.

Дар ин бора аз маркази таҳлил ва иттилооти Кумита иттилоъ доданд. Ба гуфтаи манбаъ пеш аз оғози ҷаласа ҳайати иштирокчиён аз гӯшаи намоишгоҳи дастовардҳои эҷодӣ ва илмиву техникии ҷавонон тоҷик боздид намуданд

Зимни ҷаласа Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон суханронӣ намуда, ҳайати намояндагони соҳаи кор бо ҷавонони кишварҳои узви ИДМ – ро ба Тоҷикистон хайрамақдам гуфт. Ӯ аз ҷумла илова кард, ки Ҳукумати Ҷумҳурии Тоҷикистон ҷавононро неруи тавонову созанда ва пешбарандаи ҳамаи соҳаҳои ҳаёти мамлакат меҳисобад ва ҳалли мушкилоту масъалаҳои вобаста ба зиндагӣ ва таҳсилу фаъолияти онҳоро ҳамчун самти афзалиятноки сиёсати иҷтимоии худ эътироф намудааст.

- Ҳукумати Ҷумҳурии Тоҷикистон дар такя ба соҳаи ваколатдор - Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар самти тарбияи кадрҳои ҷавон барои ҳамаи соҳаҳои иқтисоди миллӣ, баланд бардоштани ҳисси ватандӯстӣ, дастгирии ҳамаҷонибаи мутахассисони ҷавон ва беҳтар гардонидани вазъи иҷтимоиву иқтисодии онҳо пайваста кӯшиш дорад. Дар ин росто, ба роҳ мондани ҳамкориҳо ҷиҳати рушди зеҳнии ҷавонон, ҷалби онҳо ба илм ва азхудкунии техникаву технологияҳои муосир яке аз самтҳои муҳими сиёсати давлатӣ мо ба шумор меравад- гуфт дар идома раиси Кумита.

Дар ҷаласа масъалаҳои беҳтар намудани сиёсати кор бо ҷавонони кишварҳои узви ИДМ ва роҳандозии ҳамкориҳои мутақобилан судманд бо созмону ташкилотҳои ҷавонони Иттиҳоди Давлатҳои Мустақил мавриди баррасӣ қарор гирифт.

Ёдовар мешавем, ки ҷаласаи Шурои кор бо ҷавонони кишварҳои ИДМ аз 29 то 31 октябри соли 2024 дар шаҳри Душанбе ба нақша гирифта шуда, дар он намояндагони созмонҳои ҷавонон аз кишварҳои ИДМ ширкат варзида, масъалаҳои муҳими рушди сиёсати ҷавонон, табодули таҷриба ва таҳкими робитаҳои фарҳангиро мавриди баррасӣ қарор медиҳанд.

Иштирокчиёни ҷаласаи ин Шуро доир ба лоиҳаҳои муштараки ҳамкорӣ дар оянда миёни ҳам табодули афкор намуда, омодагии худро барои идомаи ҳамкорӣ дар доираи соҳаи кор бо ҷавонон бо кишварҳои ИДМ изҳор намуданд.