Баҳри пешгирии зуҳуроти номатлуб, фарогирии духтарон ба зинаи сеюми таҳсил, худкушӣ ва сӯиқасд ба ҷони худ, ба ҷиноят даст задани занону духтарон ахиран аз тарафи Раёсати кор бо занон ва оилаи мақомоти иҷроияи ҳокимияти давлатии вилояти Хатлон аз ҳисоби занони фаъол, соҳибтаҷрибаву рӯзгордида, аъзоёни гурӯҳҳои мушоҳидони маҳаллаҳо гурӯҳи доимамалкунанда таъсис дода шуд.

Чанде пеш намояндагони ин гурӯҳ бо сарварии сардори Раёсати кор бо занон ва оилаи мақомоти иҷроияи ҳокимияти давлатии вилояти Хатлон Раъно Раҳимзода, сармуҳаррири рӯзномаи вилоятии “Хатлон” Асалмо Сафарова ва дигар аъзоёни ин гурӯҳ дар маркази ноҳияи Мир Саид Алии Ҳамодонӣ бо занони фаъол ва сокинони ноҳия мулоқот анҷом доданд.

Раъно Раҳимзода оид ба масъалаҳои пешгирии шомилшавии ҷавонону наврасон ба ҳизбу ҳаракатҳои мамнуъ, аз байн бурдани ҳолатҳои номатлуб, аз қабили суиқасд ба ҷони худ, пешгирии пошхӯрии оилаҳо ва ҳамзамон доир ба ташвиқу тарғиби ҳунарҳои миллӣ, аз ҷумла сӯзанидӯзӣ, адрасбофӣ ва қолинбофӣ ва ғайра ибрози назар намуд.

Баромадкунандагон дар идомаи суҳбаташон баҳри татбиқи Қонуни Ҷумҳурии Тоҷикистон “Дар бораи масъулияти падару модар дар таълиму тарбияи фарзанд” ва риояи Қонуни Ҷумҳурии Тоҷикистон “Дар бораи танзими анъана ва ҷашну маросимҳои миллӣ” бо мисолҳои мушаххас ибрози назар намуданд.

Умед МИРЗОЕВ, “ҶТ”