Имрӯз дар доираи нақшаи чорабиниҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар якҷоягӣ бо Донишгоҳи давлатии омӯзгории Тоҷикистон ба номи Садриддин Айнӣ, дар ҳошияи Паёми Президенти Ҷумҳурии Тоҷикистон муҳтарам Эмомалӣ Раҳмон ва ба анҷом расидани марҳилаи аввали “Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2021–2025”, конференсияи илмӣ-амалӣ таҳти унвони “Амнияти иттилоотии ҷавонон ҳамчун омили асосии пешгирии шомилшавӣ ба гурӯҳҳои террористиву экстремистӣ” доир шуд.

Тибқи иттилои маркази таҳлил ва иттилооти Кумитаи кор бо ҷавонон ва варзиш, дар кори конференсия роҳбарият ва кормандони Кумитаи кор бо ҷавонон ва варзиш, намояндагони Прокуратураи генералии Ҷумҳурии Тоҷикистон, Вазорати корҳои дохилӣ, Кумитаи давлатии амнияти миллӣ, устодону донишҷӯёни Донишгоҳи давлатии омӯзгории Тоҷикистон ба номи Садриддин Айнӣ, донишҷӯёни дигар муассисаҳои таҳсилоти олӣ, инчунин сарбозону афсарони Қӯшунҳои сарҳадии КДАМ ва Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон иштирок намуданд.

Дар ҷараёни конференсия муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Чоршанбезода Сураҷ бо маърӯзаи пурмуҳтаво суханронӣ намуд.

Зимни суханронии худ Чоршанбезода Сураҷ ба масъалаҳои муҳими таҳкими амнияти иттилоотӣ миёни ҷавонон, баланд бардоштани маърифати ҳуқуқиву сиёсӣ ва нақши муассисаҳои давлатӣ дар пешгирии равандҳои номатлуб таваҷҷуҳи хос зоҳир кард. Таъкид гардид, ки ҳифзи фазои иттилоотӣ ва истифодаи босамари шабакаҳои иҷтимоӣ яке аз самтҳои афзалиятноки сиёсати давлатии ҷавонон ба шумор меравад.

Инчунин, мавсуф нақши ҳамкории сохторҳои давлатӣ, муассисаҳои таълимӣ ва ҷомеаи шаҳрвандиро дар пешгирии шомилшавии ҷавонон ба гурӯҳҳои ифротгаро муҳим арзёбӣ намуда, зарурати гузаронидани чорабиниҳои иттилоотию фаҳмондадиҳиро таъкид намуд.

“ҶТ”