Бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва бо дастгирии Мақомоти иҷроияи ҳокимияти давлатии вилояти Суғд дар бинои Маркази фарҳанги шаҳри Хуҷанд ҳамоиши ҷумҳуриявии ятимони кул таҳти унвони “Пешвои миллат – ғамхори ятимон” бахшида ба Рӯзи пойтахт бо иштироки 160 нафар ятимони кулл ва бепарасторон аз тамоми қаламрави вилоят баргузор гардид.

Зикр карда шуд, ки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои зиндагии осоиштаи ятимон тамоми шароитҳои замони муосирро фароҳам овардааст. Ятимон бояд илм омӯзанду Ватанро дӯст доранд, барои зиндагии минбаъдаи хеш талош намоянд ва чун пайравони асили Пешвои миллат дар роҳи ободонии кишвар саҳмгузор бошанд.

Маъруф Муҳаммадзода, раиси шаҳри Хуҷанд зимни баромади хеш иброз дошт, ки “Давлату Ҳукумати Тоҷикистон таҳти раҳнамоиҳои Пешвои миллат ҳанӯз аз рӯзҳои аввали истиқлолият ҳифзи иҷтимоии гурӯҳҳои ниёзманду осебпазири аҳолиро ҳамчун самти асосии сиёсати худ муайян намуда, дастгирии мунтазами ятимону бепарасторон ва фароҳам овардани шароити зарурии таҳсил ва кору фаъолиятро барои онҳо ҳадафи муҳимтарини худ қарор додаанд”.

Баъд аз мулоқот иштирокдорони ҳамоиши ҷумҳуриявии ятимони кулл таҳти унвони “Пешвои миллат-ғамхори ятимон” аз Муассисаи давлатии маҷмааи таърихӣ-фарҳангии “Истиқлол”, Осорхонаи вилоятии “Қалъаи Хуҷанд” ва Боғи фарҳангӣ-фароғатии ба номи Камоли Хуҷандӣ боздид намуда, сипас баҳри болидарӯҳии иштирокчиён дар Боғи фарҳангӣ-фароғатии ба номи Камоли Хуҷандӣ барномаи фарҳангиву фароғатӣ таҳти унвони “Шоми дӯстӣ” доир гардид.