Соли сипаригардида теъдоди умумии табибон ва кормандони миёнаи тиббӣ дар ҷумҳурӣ мутаносибан 21 592 ва 62 445 нафарро ташкил медиҳад, ки ин нишондод нисбат ба соли 2022-юм 1,98 ва 1,7% зиёд мебошад.

Дар ин бора 12 феврал Ҷамолиддин Абдуллозода, вазири тандурустии кишвар зимни нишасти хабарӣ ба рӯзноманигорон иттилоъ дод.

Зикр гардид, ки соли 2022 аз ҳисоби хатмкардаҳои гурӯҳҳои буҷети соли таҳсили 2019-2020-и ДДТТ ба номи Абуалӣ ибни Сино 505 нафар (интернаҳо) ва соли таҳсили 2018-2019 34 нафар (ординаторҳо) ба муассисаҳои тиббӣ ба кор равона шуда, теъдоди ба кор ҳозиршудагон 91,0%-ро ташкил дод.

- Ҳамзамон аз ҳисоби хатмкардаҳои гурӯҳҳои шартномавии муассисаҳои таҳсилоти олии тиббӣ дар соли 2023-юм 457 нафар мутахассис аз рӯи ихтисосҳои гуногун бо ҷои кор таъмин гардиданд, ки аз инҳо 58 нафарашон хатмкардаҳои донишгоҳҳои хориҷӣ мебошанд, - гуфта шуд дар идома.