Бахшида ба 27 – солагии Рӯзи таъсисёбии Қуввваҳои Мусаллаҳи Ҷумҳурии Тоҷикистон бо ширкати собиқадорони ҷангу меҳнат дар Донишгоҳи давлатии Хоруғ ба номи Моёншо Назаршоев конференсияи илмӣ – амалӣ гузашт.

Чорабиниро Таҳмин Содатқадамова, муовини ректори Донишгоҳ оид ба илм ва инноватсия ифтитоҳ намуда, иброз дошт, ки 27 сол пеш дар рўзҳои басо душвори таърихӣ Артиши миллии кишвар таъсис ёфта буд ва давра ба давра чун ҳомии Истиқлолияти давлативу ваҳдати миллӣ рушд намуд.

Феълан артишамон иқтидори бузург дошта, дар ҳайати қувваҳои он ҷавонон аз ҳамаи гӯшаву канори ҷумҳурӣ ба ҳам омада, якдилона марзу буми Ватан ва ҳар як ваҷаб хоки поки онро чун гавҳараки чашм муҳофизат мекунанд.

Қайд гардид, ки артиш як сутуни устувор ва кафили соҳибистиқлолӣ буда, ҳастии миллату давлатро таъмин менамояд.

Анъанаи ҳифзи хоки муқаддаси Ватану озодихоҳӣ барои миллатамон аз таърихи куҳан ва муборизони роҳи озодӣ чун Спитамену Муқаннаъ, Темурмалику Восеъ ва дигар шаҳидони ин масир ба мо ба мерос мондааст.

Дар конфересияи инчунин маърӯзаҳои “Муҳиммияти Артиши миллӣ”, “Таъсисёбии Қувваҳои мусаллаҳи Ҷумҳурии Тоҷикистон”, “Шуҷоату далерӣ ва оини ҷавонмардӣ”, “Меҳри Ватан” ироа шуда, сипас донишҷӯёну ҷавонон перомуни ватан – модар шеърҳои баландмазмунро қироат намуданд.

Дар фарҷом аз тарафи роҳбарияти донишгоҳ ба собиқадорон ифтихорнома тақдим шуд.