ҶОМЕА
Якшанбе 11 Апрел 2021 12:56
3431
Даҳ соле, ки Қонуни Ҷумҳурии Тоҷикистон “Дар бораи танзими анъана ва ҷашну маросимҳо дар Ҷумҳурии Тоҷикистон” дар дурдасттарин ва баландкӯҳтарин минтақаи мамлакат – ноҳияи Мурғоб низ мавриди амал қарор дорад, баҳри рӯзгори осуда ва шоистаи мардум самараҳои худро дода истодааст. Дар ин хусус сокинони тоҷик ва қирғиз, алалхусус қутоспарварони ҷавони ин минтақаи табиаташ ба моҳу ситорагон ва дигар ҷирмҳои коиноти бузург шабеҳдоштаи паҳноҳои Помири шарқӣ бо хушнудӣ ва самимият сухан меронанд. Онҳо, пеш аз ҳама, аз дастгириҳо ва ғамхориҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар рушди иқтисодӣ ва иҷтимоии ин минтақаи дурдаст ва баландкӯҳ изҳори миннатдорӣ менамоянд.

Мудири бахши дин, танзими анъана ва ҷашну маросимҳои миллии мақомоти иҷроияи маҳаллии ҳокимияти давлатии ноҳияи Мурғоб Умар Сафаров, ки хеле ҷавон аст мегӯяд, ки сокинони ҷамоатҳои деҳоти “Мурғоб”, “Қарокӯл” ва “Рангкӯл” ба номи Ғожо Бердибаеву Аличур, Қизил Работ ва инчунин авулҳои чорводорнишини Помири шарқӣ низ қаноатмандии хешро мисли дигар бошандагони Вилояти Мухтори Кӯҳистони Бадахшон аз қабули чунин қонуни ҳаётан муҳиме, ки баҳри рушди иқтисодӣ ва иҷтимоии ин диёри тулӯи хуршеди ховар даҳ сол боз мусоидат кардааст, баён менамоянд. Номбурда хотиррасон мекунад, ки дар ин минтақа қисми зиёди аҳолӣ ва кулли авулнишинон, ки 80 фоизашонро ҷавонон ташкил медиҳанд, ба касби чорводорӣ машғуланд. Қабули қонуни мазкур, ки яке аз талаботҳои асосии он сарфаву сариштакорӣ дар ҷашну маросимҳо мебошад, ба он мусоидат намудааст, ки дар муддати даҳ сол саршумори қутосҳо аз 18 ҳазор сари соли 2007 алҳол ба 22 ҳазор сар ва бузу гӯсфандон аз 54 ҳазор сар ба зиёда аз 81 ҳазор сар расонида шудааст. Мардуми ин диёр бо роҳи сарфа ва сариштакорӣ сол то сол саршумори ҳайвонот, аз ҷумла қутосҳо (бо лаҳҷаи мардумӣ “хушговҳо)-ро афзоиш медиҳанд, ки дар ин кор саҳми ҷавонон басе назаррас аст.

Ҳамзамон мудири Бахши кор бо ҷавонон ва варзиши ноҳия Ҷамбулат Қамчибеков аз он хусус ёдовар шуданд, ки пеш аз қабули қонуни мазкур дар тӯй ва дигар ҷашну маросимҳо дар ноҳияи Мурғоб маъракаҳои бузкашӣ ва пойгаи асптозиву дигар анъанаҳои зиёдатии миёншиканро мегузарониданд. Баъзе ашхос дороии худро нишон дода, дар тӯйҳо 4-5 сар қутос ва 10-15 сар бузу гӯсфанд мекуштанд. Баъди қабули қонуни мазкур мардуми ин сарзамини тулӯи хуршеди ховар, махсусан ҷавонон эҳтиёткор, мулоҳизакор ва сарфакор гаштаанд. Мусобиқаҳои бузкашӣ ва пойгаи аспҳо, ки яке аз маросимҳои қадимаи мардуми тоҷик ва қирғизи ин диёр мебошад, танҳо дар ҷашнҳои Наврӯз ва Истиқлолияти кишвар гузаронида мешаванд.

Мудири Бахши кор бо ҷавонон ва варзиши ноҳияи Мурғоб Ҷамбулат Қамчибеков инчунин як пешниҳоди хубу ҷолиберо ба миён гузоштанд. Ӯ таклиф менамояд, ки аз ҳамин “Соли ҷавонон” сар карда, ба навхонадорон баҳри ободии рӯзгорашон ва бо мақсади рушди минбаъдаи соҳаи чорводорӣ, алалхусус парвариши ҳайвоноти нодир – қутосҳо аз ҷониби волидайн ба ҷои баъзе асбобу анҷомҳои нозарури тариқи роҳҳои дуру дароз аз шаҳри Оши Ҷумҳурии Қирғизистон, Душанбеву Хоруғ ва кишвари Чин овардашуда қутосбачаҳо ва бузу гӯсфанд тақдим карда шавад. Ин иқдом ба он мусоидат менамояд, ки ин самтҳои афзалиятнок – қутоспарварӣ ва гӯсфандпарварӣ дар чорсӯи водиҳои паҳновари Помири шарқӣ аз водии “Аличур” сар карда, то “Қизил Работ”-у “Зоркӯл” ва “Қарокӯл”-у “Қизиларт” дучанд рушд ёбад. Бо ҳамин васила дараҷаи зисту зиндагонии оилаҳои ҷавон боз ҳам беҳтар гардонида шавад.

Сироншоҳи ДИЛОВАР, рӯзноманигор

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 1 2

Апрел 2021 c.