Дар Ҷумҳурии Тоҷикистон Аввалин бонки молиявии хурд номи худро ба Ҷамъияти саҳомии пӯшидаи “Бонки сармоягузорӣ ва қарзии Тоҷикистон” иваз намуд.

Дар ин бора Ҷамъияти саҳомии пӯшидаи “Бонки сармоягузорӣ ва қарзии Тоҷикистон” иттилоъ дод.

Дар иттилоияе, ки дар сомонаи расмии бонк нашр гардидааст, гуфта мешавад, ки бо тағйирёбии ном ҳар амалиёте, ки ба мизоҷон рабт дорад, бетағйир мемонад ва танҳо дар баъзе бахшҳои коргузорӣ, баъзе тағйиротҳо ворид карда мешаванд.

Тағйирёбии ном ба хариди Бонк ва ба ҳамроҳшавӣ ва ё якҷояшавӣ тааллуқ надорад ва сохтори моликони (саҳомон), Шурои директорон, роҳбарият ва тамоми кормандон бетағйир хоҳанд монд.

Инчунин шартномаҳои пасандоз ва амонатҳо бо Бонк иваз намешаванд ва зарурати тағйир додани шартномаҳои муштариён бо бонк вуҷуд надорад, зеро ҳама пасандозҳо ба таври муқаррарӣ идома мекунанд. Яъне бонк ӯҳдадориҳои худро пурра ва мисли қаблӣ иҷро хоҳад кард.

Ҳамзамон гуфта мешавад, ки ҳама шартномаҳои қарзӣ бо бонк чун қаблӣ боқӣ мемонанд ва аз ҷониби муштариён зарурати иваз кардани шартномаҳои қарзӣ бо Бонк вуҷуд надорад. Мизоҷон метавонанд қарзҳои худро мисли пештара тавассути оффисҳои бонкӣ, онлайн ва терминалҳо пардохт намоянд. Ҳама кортҳои мавҷудбудаи бонкӣ (“Корти миллӣ” ва “ВИЗА”) то ба охир расидани муҳлати эътибор чун қабл фаъол мебошанд.