Имсол барномаҳои фарҳангии наврӯзии ноҳияҳои пойтахт ва “Карнавали Наврӯзӣ”, ки мебоист рӯзҳои 21 – 22 март баргузор мегардиданд, ду рӯз ақиб партофта шуд.

Тавре аз дафтари матбуоти шаҳрдории Душанбе хабар доданд, имсол барномаҳои фарҳангии наврӯзии ноҳияҳои пойтахт санаи 23 март дар боғҳои фарҳангӣ-фароғатии шаҳр ва “Карнавали Наврӯзӣ” санаи 24 март, дар Майдони Истиқлоли шаҳри Душанбе, нимаи дуюми рӯз баргузор мегардад.

Мақомоти иҷроияи ҳокимияти давлатии шаҳри Душанбе бо нашри як иттилоия аз сокинон ва меҳмонони пойтахт хостааст, ки рӯзҳои 23 -24 ба ҷашнгоҳ биёянд.

Тавре дафтари матбуоти шаҳрдорӣ дар идомаи иттилоия навистааст, ба иттилои Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон, рӯзҳои 21 ва 22 март дар пойтахт ҳаво тағйирёбанда буда, боридани борони шадид дар назар дошта шудааст.