ҶОМЕА
Сешанбе 26 Март 2019 07:19
5233

Барои ҷавонон заминаи мусоиди хонишу таҳсил ва кору фаъолияти созгор муҳайё намудан аз маслакҳои асосии сиёсатмадорони хирадманд аст. Дар шебу фарозҳои таърихи башарият ин нукта собит гардидааст, ки ҳар сиёсатмадоре ба ҷавонон имкониятҳои мусоид фароҳам меорад, бешак барои давлату миллати худ хизмати арзандае кардааст. Ҳамин чиз асос гардида, ки роҳбарияти олии мамлакат аз замони ба сари қудрат омадан дар роҳи ба таври устувор пиёда кардани сиёсати давлатии ҷавонон қадамҳои собит мебардоранд. Ва ҳамин талошҳо буд, ки имрӯзҳо дар тамоми сатҳҳои давлатдорӣ ҷавонон кору фаъолияти бо самар менамоянд. 

Ба баландтарин вазифаҳои давлатӣ таъин гардидани ҷавононро низ метавон ба таври оқилона пиёда гаштани ҳамин сиёсат ном бурд. Ҷавонони кишвар низ ҷавобан ба ин ғамхориҳо пайваста талош бар он меварзанд, ки сазовори ин ҳама бовариҳои роҳбарияти олии мамлакат бошанд. Дар ин росто метавон аз фидокориҳои шаҳрдори Душанбе Рустами Эмомалӣ, яке аз ҷавононе, ки кору пайкораш воқеан ҳам арзандаи ситоиш аст, ном бурд. 

Рустами Эмомалӣ дар давраи роҳбарӣ бо кордонию диди тозаи худ тавонист ба санъати шаҳрсозиву шаҳрдорӣ қабои дигар пӯшонад. Анъанаву суннатҳои шаҳрсозиву шаҳрдорӣ ва санъати меъмории халқи кӯҳанбунёди тоҷикро, ки дар масири пурмоҷарои таърих майл ба нест шудан доштанд, дубора эҳё кард. Дар давраи кутоҳи роҳбарӣ бо азму иродаи қавӣ ва кордониаш тавонист шаҳри Душанберо ба яке аз беҳтарин шаҳрҳои Осиёи Марказӣ табдил диҳад. Шаҳри Душанбе оҳиста-оҳиста симои худро дигар карда, тадриҷан ба шаҳри бузург мубаддал гашт. Хонаҳои серошёнаи замонавӣ, қасру толорҳои барҳаво, театр, биноҳои маъмурию фарҳангӣ сохта шуданд, ки ҳусни онро боз ҳам зеботар намуд. Ва имрӯз шаҳри Душанбе маркази сиёсӣ, фарҳангӣ ва иқтисодии ҷумҳурӣ мебошад. 

Дар ин давраи кутоҳи раҳбарӣ Рустами Эмомалӣ тавонистанд, даҳҳо боғу гулгаштҳоро бо шароитҳои созгору муосир мавриди баҳрабардорӣ қарор диҳанд. Боғи фарҳангӣ – фароғатии “Ҷавонон”, Боғи фарҳангӣ – фароғатии “Кӯли ҷавонон”, Боғи “Низомиддин Алишери Навоӣ”, Боғи ба номи Аҳмади Дониш, Боғи ба номи Садриддин Айнӣ, Боғи фарҳангӣ – фароғатии ба номи Абдулқосим Фирдавсӣ, сохтани иншоотҳои наву замонавӣ, сохтани роҳҳои сетабақа ва ғайраҳо далели равшан аз иқдомҳои нав ва беназири шаҳрдори ҷавони кишвар Рустами Эмомалист.

Тавре аз сомонаи шаҳрдорӣ хабар додаанд, то ҷашни Истиқлолияти давлатӣ ҷиҳати боз ҳам баланд бардоштани сатҳи маишӣ ва солимгардонии сокинону меҳмонон боз 58 майдончаи варзишӣ ва 12 боғу гулгашт барои истироҳату фароғати сокинон сохта ба истифода дода мешавад.

Иҷрокунандаи вазифаи сафири ШМА дар Тоҷикистон дар як мусоҳибааш перомуни ободкориҳои шаҳри Душанбе чунин гуфта буд: “Сафари нахустини кории ман ба Душанбе чанд сол пеш сурат гирифта буд, аммо ин дафъа ба Тоҷикистон омада, аз пешравиҳои кишвари шумо дар тааҷҷуб шудам. Ман Душанберо нашинохтам! Ҳама чӣ иваз шудааст - кӯчаву хиёбонҳо, биноҳои нав, гулгаштҳо, инфрасохтор, меҳмонхонаҳои сатҳи байналмилалӣ, нақлиёт ва аз ҳама муҳим амният. Душанбе имрӯз ба қатори амнтарин шаҳрҳои ҷаҳон шомил шудааст ва дар ҳақиқат дилхоҳ вақти шаб ба кӯча бароед касе ба шумо кордор нест. Ман Душанбеи навро дӯст доштам ва худамро ин ҷо хеле озод ҳис мекунам”.

Хурсандиовар аст, ки созмонҳову ташкилотҳои бонуфузи ҷаҳоние чун Департаменти давлатии ИМА шаҳри Душанберо ба қатори амнтарин шаҳрҳои сайёра дохил гардонид. Бино ба натиҷаҳои назарпурсии агентии таҳлилии “ТурСтат”-и Русия бошад, пойтахти Тоҷикистон – шаҳри Душанбе ба қатори 10 шаҳри дар айёми баҳор барои сайёҳӣ муносиби Иттиҳоди Давлатҳои Мустақил шомил гардид.

Дар самти сиёсати беруна низ роҳбарияти шаҳри Душанбе корҳои назаррасро ба сомон расонида, дастовардҳои зиёдеро касб намуд ва бо ташаббусҳои сатҳи байналхалқӣ эътибору нуфузи шаҳри Душанберо афзуд. Ҳамин кордониву дуруст ба роҳ мондани сиёсати хориҷии шаҳрдорӣ буд, ки дар давраи роҳбарии ӯ шаҳри Душанбе бо шаҳрҳои Ашқободи Туркманистон, Тошканди Ӯзбекистон, Синдао, Сямэн ва музофоти Хайнани Ҷумҳурии Мардумии Чин,  Болдери Штатҳои Муттаҳидаи Амрико бародаршаҳр эълон гардиданд.

Рустами Эмомалӣ дар самти тарбияи варзишии ҷавонон, ташвиқу тарғиби тарзи ҳаёти солим, оммавигардонии варзиш ва ба ин васила саҳм гузоштан дар рушди солимии ҷомеа аз рӯзҳои нахустини ба соҳаи роҳбарӣ қадам ниҳодан корҳои арзандаеро ба сомон расониданд. Аз замони президенти Федератсияи футболи мамлакат гардиданаш ин ҷавони дурандеш тавонист, ки футболи мамлакатро то дараҷаи камолот расонад. То мусобиқаҳои сатҳи ҷаҳонӣ баромадани дастаҳои футболи мамлакат ва бо ҷойҳои ифтихорӣ баргаштани эшон аз ин мусобиқаҳо аз дастгириҳои ӯ дар рушди соҳаи футболи кишвар аст. Давоми солҳои 2017-2018 дар шаҳр, ҷиҳати ба варзиш ҷалб гардидани ҷавонону наврасон корҳои зиёде ба сомон расонида шуд. Аз ҷумла дар ҳамин давра дар шаҳри Душанбе зиёда аз 167 майдончаи варзишии мувофиқ ба талаботи замон сохта ба истифода дода шуд.

Дастгириву сарпарастиҳои президенти Федератсияи футболи мамлакат дар ду соли охир ҳудуди миллионҳо ҷавонро ба ҳам оварда, дар рушди минбаъдаи эшон заминаҳои созгор фароҳам овардааст. Танҳо дар соли 2017 дар самти татбиқи сиёсати давлатии кор бо ҷавонон 17036 чорабинӣ бо фарогирии 4064549 нафар наврасону ҷавонон баргузор гашта буд, ки ин барои ҷомеаи кишвар ва хусусан насли наврас хотирмон буд. Мувофиқи нишондодҳо ин адад дар соли 2018 низ рӯ ба болоравӣ ниҳод. Қариб кулли чорабиниҳое, ки дар самти ҷавонон ва рушди сайёҳиву ҳунармандӣ аз ҷониби Кумитаи кор бо ҷавонон ва варзиш роҳандозӣ карда шуд, бо сарпарастии президенти Федаратсияи  футбол Рустами Эмомалӣ баргузор гардидаанд. Сарпарастӣ намудани ин миқдор чорабиниҳо, яъне, фароҳам овардани шароити иқтисодиву иҷтимоӣ ва инфрасохторӣ барои баргузории чорабиниҳо яке аз ташаббусҳои беназир ва наҷиби ҷавонмардиву ватандӯстии президенти Федератсияи футболи кишвар ва раиси шаҳри Душанбе, муҳтарам Рустами Эмомалӣ мебошад. Ҷои баҳс нест, ки чунин талошро танҳо метавонад нафаре анҷом диҳад, ки воқеан дар замираш меҳри Ватан ҷӯш мезанад ва ба таври ҳамешагӣ хостори дар рӯҳияи ватанпарастӣ тарбия ва ба камол расидани насли наврасу ҷавони Ватан аст. 

Ҳама ин ободкориҳову созандагиҳоро ба инобат гирифта Ҳукумати кишвар эшонро бо чандин ифтихорнома ва сипосномаву ҷоизаҳо қадрдонӣ кардааст. Дар санаи 30-юми августи соли равон бо Фармони Президенти Ҷумҳурии Тоҷикистон барои фаъолияти арзандаву самаранок дар мақомоти маҳаллии ҳокимияти давлатӣ Рустами Эмомалӣ - Раиси шаҳри Душанбе бо Ордени “Зарринтоҷ” дараҷаи 2 сарфароз гардид. 


Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
25 26 27 28 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Март 2019 c.