ҶОМЕА
Якшанбе 27 Сентябр 2020 06:06
7202

“Ҳамеша орзу мекардам, ки солим бошаму мисли дигар одамон озодона қадам занам. Аз хурдӣ ҳарду поям маъюб буд. Азбаски мо дар деҳаи дурдасттарини кишвар зиндагӣ доштему барои табобати пойҳоям имконият набуд, айёми кӯдакию наврасиамро бо мушкилиҳои зиёд гузаронидам”.

Ин сатрҳоро Сумбулаи 33 сола бо дард қисса мекунаду вале имрӯз хушҳол аз он аст, ки баъди ҷарроҳӣ дубора озодона роҳ рафта метавонад.

Сумбула баъд аз таваллуд ҳамин дардро дошт, аммо ба ҳамаи ин нигоҳ накарда, ба мактаб мерафт. Аз сардии ҳавои деҳа азоб мекашиду ба тақдираш тан намедод. Соли 2005 мактаби ноҳияи Ишкошими ВМКБ-ро бо баҳои хубу аъло хатм намуда, тасмим мегирад, ки ба пойтахти кишвар барои давом додани таҳсил равад.

“Ҳамин гуна ҳам шуд. Пас аз хатми мактаби миёна, худи ҳамон сол ба факултети филологияи тоҷики Донишгоҳи давлатии омӯзгории Тоҷикистон ҳуҷҷат супорида, ба номи пуршарафи донишҷӯй мушарраф гардидам. Дар пойтахт ҳам аз дарди пойҳоям азоб мекашидам. Ҳамеша аз Худованд талабгор будам, ки барои таҳаммули дарди доштаам қувват диҳад. Чунки аз зиндагӣ умед доштам”, -илова намуд Сумбула.

Ӯ дар баробари таҳсил ҳамеша пойҳояшро табобат мекард. Рӯз то рӯз табобати вай гаронтар мешуду дигар қудрати пардохт намудани маблағро надошт. Баъди хатми донишгоҳ Сумбула тасмим гирифт, ки корманди ин муассиса гардад, то маблағе ба даст оварду табобати худро давом диҳад. 5 сол боз дар факултети филология ба сифати мутахассиси пешбар кор мекунад. Гарчанде ӯро ҳамаҷониба дастгирӣ мекарданд, аммо беморияш паси сар нашуд.

Сол то сол дарди пойҳояш зиёд мешуду рафтуомадаш ба кор душвортар мегардид. Мувофиқи ташхиси духтурон гузаронидани амалиёти ҷарроҳӣ ба маблағи 7 ҳазор доллар лозим буд. Вале Сумбула ин қадар маблағро надошт ва умед ҳам намекард, ки ин маблағро ёфта тавонад. Падару модараш нафақахӯр буданду имкони ба ӯ ёрӣ расониданро надоштанд. Ягона умедаш муроҷиат ба Пешвои миллат муҳтарам Эмомалӣ Раҳмон буд.

Тақдири ӯ баландӣ карду соли 2017 баъди эълон гардидани Соли ҷавонон ва дастгирии бевоситаи ҷавонон аз ҷониби Президенти кишвар, Сумбула низ ҳамчун як ҷавон барои табобати пойҳояш ба Президенти кишвар нома навишт.

“Бори аввал моҳи марти соли 2017 ба хотири ҷарроҳии пойҳои маъюбам ба Пешвои миллат муроҷиат кардам ва дарҳол ба номаам аз ҷониби Мақомоти иҷроияи ҳокимияти давлатии шаҳри Душанбе ва Вазорати тандурустӣ ва ҳифзи иҷтимоии аҳолӣ посух омаду маро барои ташхис ба беморхонаи “Истиқлол” бурданд. Пас аз ташхиси навбатӣ аз пайи ҷарроҳии пойҳоям шуданд”, -гуфт Сумбула.

Пас аз ин ҷарроҳӣ хурсандии ӯ ҳадду канор надошт. Зеро баъди он пойҳояш солим гардиданду барои аввалин бор баъди табобат рӯйи замин қадамҳои нахустини худро мегузошту аз чашмонаш ашки шодӣ сарозер мешуд. Миннатдор аз Офаридгор буд, ки баъди солҳои зиёди дардмандӣ ахиран бо кумаки Асосгузори сулҳу ваҳдати миллӣ - Пешвои миллат, Президенти кишвар шифо ёфту имрӯз мисли дигарон қадам мезанаду аз лаҳзаҳои хуши ҳаёт ҳаловат мебарад.

“Аз Пешвои миллат муҳтарам Эмомалӣ Раҳмон миннатдорам, ки кумаки худро бароям дареғ надоштанд. Маҳз дастгирии онҳо боис гардид, ки ба ҳаёти солим баргаштам. Воқеан, онҳо ҳамеша дастгиру мададрасони ниёзмандон ҳастанд”, - гуфт дар охир ӯ.

Сумбула имрӯз солим асту табассум аз лабонаш канда нест. Ҳамеша хушнуд асту бо умед зиндагӣ дорад. Ва ҳамин умед буд, ки варо ба зиндагии нек расонд.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
31 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 1 2 3 4

Сентябр 2020 c.