ҶОМЕА
Ҷумъа 22 Октябр 2021 02:27
8129
Аз мушоҳидаҳо бармеояд, ки солҳои охир бештари модарони ҷавон бо баҳонаи тағйир ёфтани шакли зоҳирии худ, аз синамаконӣ даст кашида, навзоди худро бо шири сунъӣ калон мекунанд. Аммо ба гуфтаи мутахассисон шири сунъӣ ба навзод зарар дорад ва боиси хурӯҷи бемориҳои гуногун мегардад.

Чун ба ҳамагон маълум аст, ғизои асосии кӯдаки навзод шири модар буда, ӯ танҳо тавассути ғизои дурусту солим неру мегираду ташаккул меёбад. Мутахассисони соҳаи тиб низ бар он назаранд, ки кӯдакони ғизои сунъӣ истеъмолкунанда ба бемориҳои сироятии меъдаю рӯда ва бемориҳои шадиди роҳҳои нафас гирифтор мешаванд.

Ҷамила Қаюмова, табиби тоҷик мегӯяд, ки модарон бояд кӯшиш кунанд, то 1,5 – солагӣ ба фарзанди навзоди худ сина диҳанд.

“Вақте фарзанд азоб мекашад, пеш аз ҳама худи модар ба мушкилиҳои зиёд дучор мегардад. Қариб ҳар зан метавонад, кӯдаки худро сина маконад. Аммо бо найрангҳои гуногун аз синамаконӣ худдорӣ мекунанд. Шири модар барои солим ба камол расидани фарзанд хеле мувофиқ буда, аз ҳар гуна бемориҳои сироятӣ кӯдакро эҳтиёт мекунад.

Модар бояд дар вақти синамаконӣ аз ғизоҳои солим истифода кунад, то шираш бисёртар шавад. Лутфан инро дар хотир доред. Танҳо 5%-и модарон дар ҷаҳон бо сабабҳои гуногун наметавонанд, ба кӯдаконашон шир диҳанд”,- иброз намуд, табиб.

Робия як модари ҷавон, ки аз барвақтӣ соҳиби фарзанд гашта, аз додани шир худдорӣ кардааст, имрӯз аз ин кори худ пушаймон аст. Ӯ бо нигаронӣ мегӯяд: “Дар баробари ба воя расидан фарзандам доимо ба бемориҳои гуногун гирифтор мешавад. Шири сунъӣ дар баробари шакли зоҳирӣ, ҳамзамон кӯдакро бақувват мекунад, аммо доимо ба сахтшавии шикам, дилбеҳазурӣ ва дигар намуди бемориҳо кӯдакро гирифтор месозад. Ман аз рӯзи аввал аз синамаконӣ даст кашидам. Аммо имрӯз, ҳам ман ва ҳам фарзандам азоб мекашем. Инчунин барои харидорӣ кардани шири сунъӣ маблағ пайдо карда наметавонам, зеро он рӯз то рӯз гаронтар шуда, дастрас намудан бароям мушкил аст”.

Имрӯз мисли Робия бисёр модарони ҷавонро метавон вохӯрд, ки чунин мушкилиро доранд. Ҳамзамон модароне низ пайдо мешаванд, ки онҳо бо маслиҳати атрофиён шири сунъиро аз табиӣ муфидтар мешуморанд.

Адиса Дилшодова, табиби оилавӣ ҳангоми суҳбат бо мо гуфт: “Дар таркиби шири модар моддаҳои лозима, ки кӯдакро бе ягон мушкилӣ ба воя мерасонад, мавҷуд аст. Шири модар ягона ғизои солим барои тифли навзод буда, кӯдакро аз ҳар гуна бемориҳои сироятӣ эмин нигоҳ медорад. Агар модарони имрӯза ҳамаи инро дидаву дониста, аз шири сунъӣ истифода мекунанд, вақти зиёди худро дар беморхонаҳо ва пушти дари табибон хоҳанд гузаронд”.

Ба гуфтаи ӯ, имрӯз дар кӯдакон бемории қанд бисёр мушоҳида мешавад, ки шири сунъӣ низ сабаби гирифторӣ ба ин беморӣ шуда метавонад. Инчунин бемории саглес (алергия), меъдаю рӯда, дилбеҳазурӣ, фишорбаландии майнаи сар аз намуди бемориҳоянд, ки аз истеъмоли шири сунъӣ пайдо мешаванд.

“Мо ҳангоми қабули кӯдаки бемор аллакай пай мебарем, ки кӯдак бо шири сунъӣ ба камол расида истодааст. Хӯроки сунъӣ дорои маводҳои зидди сироят нест. Барои ҳамин кӯдаконе, ки ғизои сунъӣ истеъмол мекунанд, тез-тез ба бемориҳои дарунравӣ гирифтор мешаванд”, - илова намуд, табиби оилавӣ.

Табибон ба модарони ҷавон тавсия медиҳанд, ки ба кӯдаки худ шири сина диҳанд, то саломатии фарзандаш хуб шавад. Ҳар як модар бояд бидонад, ки шири синаи ӯ ба саломатии ояндаи фарзанаш нақши муҳимро мебозад. Шири ӯ майнаи сар ва фаҳмиши кӯдакашро пурқувват мекунад. Ҳангоми синамаконӣ кӯдак зуд обу тоб ёфта, ҳушёру доно мешавад ва хуб инкишоф меёбад.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
27 28 29 30 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Октябр 2021 c.