2 феврал зимни нишасти матбуотӣ Прокурори генералии Ҷумҳурии Тоҷикистон, генерал-полковники адлия Раҳмон Юсуф Аҳмадзод доир ба фаъолияти мақомоти Прокуратураи Ҷумҳурии Тоҷикистон дар соли 2020 баромад карда, қайд намуд, ки дар ин давра 70 ҷаласаҳои васеи ҳайатҳои мушовараи прокуратура ва 275 ҷаласаҳои Шӯрои ҳамоҳангсозии фаъолияти мақомоти ҳифзи ҳуқуқ доир гардиданд.

Номбурда дар идома таъкид намуд, ки дар ҷаласаҳои мазкур вазъи ҷинояткорӣ, мубориза бар зидди экстремизм ва терроризм, қочоқи молу маҳсулот, ҳифзи ҳуқуқҳои соҳибкорон, қонунгузории замин, ҳифзи саломатии аҳолӣ ва дигар масъалаҳои муҳим мавриди баррасию чораандешӣ қарор дода шуданд.

Ҳамчунин гуфта шуд, ки ҳолати риоя ва иҷрои қонунгузории ҷумҳурӣ дар маҷмӯъ 5764 маротиба санҷида, баҳри бартараф намудани қонунвайронкуниҳо ва сабабу шароитҳои ба содиршавии онҳо мусоидаткунанда 11000 нафар ба ҷавобгарии интизомӣ ва 4700 нафар ба ҷавобгарии моддӣ кашида шудаанд. Инчунин прокурорҳо 2 000 парвандаҳои ҳуқуқвайронкунии маъмурӣ ва 3062 парвандаҳои ҷиноятӣ оғоз намудаанд.