Тибқи тағйиру иловаҳое, ки ба Кодекси ҷиноятии Ҷумҳурии Тоҷикистон ворид гардид, барои машғул шудан ба сеҳру ҷоду ва фолбинӣ ҷазои ҷиноятӣ пешбинӣ шудааст.

Дар ин бора нашрияи расмии “Садои мардум” иттилоъ медиҳад.

Бино ба иттилои манбаъ, ин масъала рӯзи 8-уми май дар ҷаласаи навбатии Иҷлосияи панҷуми Маҷлиси намояндагони Маҷлиси Олии Ҷумҳурии Тоҷикис¬тон даъвати шашум баррасӣ гардидааст.

Гуфта шудааст, ки ба лоиҳаи Қонуни Ҷумҳурии Тоҷикистон “Дар бораи ворид намудани тағйиру иловаҳо ба Кодекси ҷиноятии Ҷумҳурии Тоҷикистон” моддаи нав (240) ворид гардид, ки тибқи он машғул шудан ба сеҳру ҷоду ва фолбинӣ ҷавобгарии ҷиноятӣ ҳисобида мешавад.

- Машғул шудан ба сеҳру ҷоду ва фолбинӣ илова гардидааст, ки тибқи он барои машғул шудан ба сеҳру ҷоду ва фолбинӣ, агар чунин кирдор дар давоми соли баъди татбиқи ҷазои маъмурӣ содир шуда бошад, ҷавобгарии ҷиноятӣ пешбинӣ гардидааст,- зикр намудааст манбаъ.

Гуфта мешавад, ки лоиҳаи қонуни мазкур бо мақсади муайян ва пурзӯр намудани ҷавобгарии ҷиноятӣ барои монеъ шудан ба гирифтани таҳсилоти миёнаи умумӣ, иҷро накардани уҳдадорӣ оид ба таълиму тарбияи ноболиғ ва моддаҳои нав, ҷавобгарии ҷиноятӣ барои машғул шудан ба сеҳру ҷоду ва фолбинӣ, инчунин, вайрон кардани талаботи қонунгузории Ҷумҳурии Тоҷикистон дар бораи танзими ҷашну маросим таҳия гирдидааст.

Мавриди зикр аст, ки моҳи апрели соли равон Вазорати корҳои дохилии Ҷумҳурии Тоҷикистон иттилоъ дода буд, ки ҷодугарон, муллоҳои тӯмору таштобдиҳанда ва шахсони ба таълими ғайриқонунии динӣ машғулбударо рӯйхат мекунанд ва ба онҳое, ки бо мардумфиребӣ зиндагиашонро пеш мебаранд, то 6 моҳ ҷазои меҳнати маҷбурӣ дода мешавад.