Суди олии иқтисодӣ ба якчанд лоиҳаи қонуни Ҷумҳурии Тоҷикистон тағйиру иловаҳоро ворид мекунад, ки ба ҳуқуқвайронкунии соҳибкорони инфиродӣ ва шахсони ҳуқуқӣ равона мегардад. Ин нуктаро рӯзи 10-уми феврал Мавлуда Қаландарзода, раиси ин ниҳод баён намуд.

- Ҳамчунин доир ба танзими масъалаҳои ба тобеияти судҳои иқтисодӣ мансуб донистани баррасии парвандаҳои ҳуқуқвайронкунии маъмурӣ нисбат ба соҳибкорони инфиродӣ ва шахсони ҳуқуқӣ, дигар масъалаҳои мурофиаи иқтисодӣ лоиҳаҳои Қонуни конститутсионӣ “Дар бораи ворид намудани тағйиру иловаҳо ба Қонуни конститутсионии Ҷумҳурии Тоҷикистон “Дар бораи судҳои Ҷумҳурии Тоҷикистон”, Қонунҳои Ҷумҳурии Тоҷикистон “Дар бораи ворид намудани тағйиру иловаҳо ба Кодекси ҳуқуқвайронкунии маъмурии Ҷумҳурии Тоҷикистон” ва “Дар бораи ворид намудани тағйиру иловаҳо ба Кодекси мурофиавии ҳуқуқвайронкунии маъмурии Ҷумҳурии Тоҷикистон” таҳия гардида, пас аз мувофиқа бо вазорату идораҳои дахлдор барои баррасӣ ба Ҳукумати Ҷумҳурии Тоҷикистон пешниҳод карда шуданд,-гуфт Мавлуда Қаландарзода.

Ҳамзамон ӯ оид ба баланд бардоштани донишҳои назариявию амалии судяҳо ва кормандони дастгоҳи судҳои иқтисодӣ сухан карда, иброз анмуд, ки барои мусоидат ба беҳтар гардидани сифати баррасии парвандаҳо, ҷорӣ намудани татбиқи дурусти меъёрҳои ҳуқуқи моддӣ ва мурофиавӣ охири ҳар моҳ машғулияти амалӣ доир ба мавзӯъҳои қобили таваҷҷуҳ баргузор мегардад.