“Духтарам, хон, мутахассис шав ва ба халқу Ватанат хизмат намо!”. Ин таъкиди Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон буд, ки нагузошт ин духтари ҳушёру зирак ва донишманду соҳибистеъдод пешниҳодҳои кории дигар кишварҳоро қабул кунад.

Ӯ бонуест пурталошу бовиқор. Талошу донишандӯзиҳои зиёдаш буд, ки ду маротиба шарафи вохӯрӣ бо Пешвои миллат муҳтарам Эмомалӣ Раҳмон барояш ноил гашт.

Ҳангоми ҳамсуҳбат шуданаш бо Пешвои миллат ҳама роҳҳо ба хотири таҳсилу донишандӯзиаш кушода шуд. Замони таҷрибаомӯзӣ дар хориҷи кишвар ба ӯ пешниҳоди он ҷо монданро мекарданд, то дар беморхонаҳои онҳо фаъолият намояд.
Аммо ӯ ба ин гуна пешниҳодҳо ҳамеша посухи рад медод. Чун таъкиди Президенти кишвар, ки ҳангоми вохӯрӣ ба ӯ гуфта буданд, мудовим дар лавҳи хотираш ҷой дошт. Бо ба ёд овардани ин таъкид таҳсилро дар хориҷ ба итмом расонид ва омад ба ватани хешу пайи фаъолият шуд. Бале, сухан дар бораи бонуи қавииродаю бовиқор ва зани пурталошу донишманд Умеда Шокирова меравад.

Баробари ба сари ҳокимият омадани Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зиндагии мардум марҳила ба марҳила дигар гашту кишвар рӯ ба рушд ниҳод. Дар солҳои 90–уми асри гузашта Тоҷикистон дар оғӯши ҷанги шаҳрвандӣ буд. Маҳз бо ибтикори бевоситаи ин марди далеру шуҷоъ оташи ҷанги хонумонсӯз хомӯш карда шуд ва сокинони меҳан дубора ба зиндагии осуда баргаштанд.

Пешвои миллат дар ҳаёти ҳазорҳо ҷавони соҳибистеъдоди диёр нақши муассир дошта, падарвор дар таҳсилу фаъолият ва зиндагии шоистаи онҳо саҳм гузоштаанд.

Яке аз ин ҷавонон Умеда Шокирова мебошад, ки бо дастгириҳои падаронаи Пешвои миллат муҳтарам Эмомалӣ Раҳмон имрӯз ба вазифаи муовини ректори Донишгоҳи давлатии тиббии Хатлон расидааст. Мавсуф дар тули зиндагии худ чандин маротиба аз ғамхориҳои Президенти кишвар бархӯрдор гардидааст.

Умеда ҳанӯз аз даврони хурдӣ хеле духтараки ҳушёру зирак буд. Ҳамеша ба машғулиятҳо бо тайёрии пухта ҳозир мешуду дарсҳоро хуб аз бар мекард. Дар ҳаёт, таҳсил, рӯзгор ва фаъолияти касбиаш нақши Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон хеле калон аст. Ӯ худро насли хушбахти даврон меҳисобад, ки зери боми Истиқлоли давлатӣ ва зери роҳбарии Пешвои миллат зиндагӣ мекунад.

– Соли 2009 вақте дар курси сеюм таҳсил мекардам, ду нафарро барои баромад кардан дар назди Ҷаноби Олӣ омода карданд. То лаҳзаи охирин намедонистем, ки кадомамон баромад мекунем. Он вақт аз самими қалб орзу карда будам, ки ба дидори Пешвои миллат муҳтарам Эмомалӣ Раҳмон ва баромад дар наздашон ноил гардам. Воқеан, орзуям амалӣ шуд. Бо ҳаяҷон ва изтироб байни 6000 нафар дар назди Пешвои миллат баромад кардам. Тасаввурашро надоштам, ки баъди баромад дар назди Президенти кишвар аз ҷониби муҳтарам Эмомалӣ Раҳмон ин қадар дастуру супоришҳои судманд барои рушду пешрафти ҷавонони лаёқатманд дода мешавад, – бо ифтихор нақл мекунад қаҳрамони мо.

Дар ҳақиқат, шахсони хирадманду нексиришт ҳамсафу ҳамқадами замон буда, рисолати модариву қарзи шаҳрвандии худро дар густаришу такмил додани арзишҳои наҷибу волои инсонӣ, бахусус дар руҳияи баланди ватанпарастӣ тарбия намудани фарзандон, талқини андеша ва ҳувияти миллӣ, таҳкими худогоҳиву худшиносӣ ва ватандориву ватандӯстӣ бо камоли масъулият адо менамоянд. Дар ин замина агар аз ҷониби масъулин ва шахсони намоёни сиёсӣ дастгирӣ ёбанд, даҳчанд болидаруҳ гардида, барои пешрафту рушди кишвари худ ҷонфидоиҳои беназир мекунанд.

Умеда Шокирова зодаи Ҷамоати деҳоти “Хистеварз”–и ноҳияи Бобоҷон Ғафуров буда, соли 2007 муассисаи таҳсилоти миёнаи умумии таҷрибавии №5–и ноҳияи мазкур ва соли 2013 Донишгоҳи давлатии тиббии Тоҷикистон ба номи Абуалӣ ибни Синоро хатм намудааст. Дар баробари ин, соли 2013 Маркази таълимии бонувон “Сарвар”-ро низ хатм намуда, солҳои 2011-2012 ба ҳайси мутахассиси маркази захираҳои исботшудаи тиббӣ, соли 2012 оморшиноси маркази ягонаи тестӣ, солҳои 2013-2015 ординатори клиникии кафедраи акушерӣ ва гинекологии №2-и Донишгоҳи давлатии тиббии Тоҷикистон ба номи Абуалӣ ибни Сино, солҳои 2015-2016 магистранти мубодилавӣ дар Донишгоҳи Падоваи Италия, солҳои 2017-2020 аспиранти кафедраи акушерӣ ва гинекологии Донишгоҳи давлатии миллии тадқиқотии Белгород, соли 2022 духтури акушер-гинекологи клиникаи шаҳри Санкт-Петербург, солҳои 2022–2023 мудири кафед-раи акушерӣ-гинекологӣ ва тибби оилавии Донишгоҳи давлатии тиббии Хатлон ва аз моҳи сентяб-ри соли 2023 ҳамчун муовини ректор оид ба корҳои муолиҷавӣ дар донишгоҳи мазкур кору фаъолият намуда истодааст.

Ҳоло бошад, як омӯзгори муваффақу табиби ботаҷриба шуда, кору фаъолият мекунад. Шогирдони зиёдеро ба хотири рушди ояндаи кишвари азизамон омода месозад, то дар таҳкими саломатии ҷомеа саҳмгузор бошанд.

Ӯ мегӯяд, ки ба вазифаи муовини ректори Донишгоҳи давлатии тиббии Хатлон расиданаш ногаҳонӣ буд: “Вақте моҳи сентябри соли 2023 Рӯзи дониш дар назди Пешвои миллат муҳтарам Эмомалӣ Раҳмон бори дуввум ҳамчун олими ҷавон баромад намудам, Ҷаноби Олӣ дастур доданд, ки маро ба ҳайси муовини ректор ба кор қабул намоянд. Ман низ дар баробари боварӣ ва дастгириҳои Пешвои миллат муҳтарам Эмомалӣ Раҳмон кӯшиш мекунам, ки арзанда бошам ва барои рушду пешрафти Тоҷикистони азиз саҳми худро гузорам”.

Имрӯз дар фазои сулҳу оромӣ зиндагӣ кардан барои на танҳо Умеда Шокирова боиси ифтихору хушнудист, ҳамчунин барои кулли ҷавонон фараҳовар аст.

Умеда дар даврони таҳсилу фаъолияти худ ду маротиба дар назди Ҷаноби Олӣ муҳтарам Эмомалӣ Раҳмон баромад намудааст ва орзу дорад, ки бори дигар бо Пешвои миллат аз наздик вохӯрад.

- Албатта, суҳбат бо Ҷаноби Олӣ барои ҳар кас ифтихору фараҳмандӣ ва хушбахтист. Ман аз он хурсандам, ки Пешвои миллат бо ман суҳбат намуданд, аз ҳолу аҳволам пурсон шуданд, супоришу дастур доданд ва вазифадор намуданд, то дар таълиму тарбияи донишҷӯён тамоми қувваю неруи худро сарф намоям. Бемуҳобо, суҳбат бо Пешвои миллат муҳтарам Эмомалӣ Раҳмон бароям илҳому қувваи нав бахшид, дар худ ва касби интихобкардаам масъулияти боз ҳам баландтарро эҳсос намудам. Бори дигар эҳсос кардам, ки чӣ қадар Пешвои миллат нисбати зан - модар меҳрубону мушфиқ ҳастанд ва ҳатто ояндаи зан - модарро бо суханашон, бо ояндабинии хоси худашон рӯшантару беҳтар месозанд, - гуфт ӯ.

Маҳз дастгирӣ ва фароҳам овардани шароити мусоид аз ҷониби давлату Ҳукумат, хусусан сиёсати маорифпарваронаи Президенти кишвар муҳтарам Эмомалӣ Раҳмон буд, ки қаҳрамони матлаби мо тавонист фаъолияти илмии худро ҳамчун аспирант дар Донишгоҳи давлатии миллии тадқиқотии Белгород дар мавзуи “Индивидуальное прогнозирование развития аномалий родовой деятельности” ба анҷом расонад. Ҳамин тавр, ӯ соли 2021 рисолаи илмии хешро сарбаландона ҳимоя намуд.

Умеда бо мутахассисони тиббии сатҳи ҷаҳонӣ ҳамкорӣ дошта, таҷрибаи онҳоро имрӯз барои муолиҷаи беморон истифода мебарад. Инчунин, донандаи хуби забонҳои русӣ ва англисӣ мебошад. Ӯ изҳор медорад, ки барои рушду пешрафт ва то ба ин дараҷаҳо расиданаш аҳли хонаводааш зид набуданд. Баръакс, барои муваффақ шуданаш тамоми шароитро фароҳам оварданду дастгирӣ карданд.

Ба монанди Умеда Шокирова ҳазорҳо нафари дигар ҳаст, ки аз ғамхориҳои падаронаи Пешвои миллат баҳравар гардида, роҳи дурахшони худро сохтаанд. Умед мебандем, ки чунин нафарон дар ҷавоб ба дастгириҳои Сарвари давлат саҳми худро дар рушди кишвари азизамон мегузоранд.

Шаҳодат ХОЛОВА,
“ҶТ”