Имрӯз сокинони Ҷумҳурии Тоҷикистон дар арафаи таҷлили ҷашни 30 - солагии Истиқлолияти давлатии кишвар қарор дошта, ҳама талош бар он доранд, ки иди сарнавиштсоз бо тамоми шукӯҳу шаҳомат истиқбол гирифта шавад.

Вусъати корҳои созандагию бунёдкорӣ, кабудизоркунию гул-гулшукуфӣ, таҷдиду азнавсозии ҳазорҳо иншооти хурду бузург, омодагӣ ба чорабиниҳои сатҳи минтақавию байналмилалӣ ва дигар кору фаъолиятҳои босамар аз натиҷаи ташаббуси воқеӣ ва сиёсати хирадмандонаи роҳбарияти олии мамлакату Ҳукумати кишвар шаҳодат медиҳанд.

Аммо то кунун дар ҷомеа афроди ғараздору бешараф, ватансӯзу хиёнатпеша ва кӯрнамаку беҳаёе ҳастанд, ки ҳаёти хешро сарфи бадбинию хушунат карда, хизматгори хоҷагони хориҷӣ шудаанд.

Шабнам Мансурова, сокини шаҳри Хоруғ мегӯяд, аз он бояд бифахрем, ки таҳти роҳбарии Пешвои муаззами миллат муҳтарам Эмомалӣ Раҳмон 30 сол дар фазои сулҳу субот умр ба сар бурда, таҳти ливои Истиқлолият сарҷамъ ҳастем.

- Бархе ҳамватанони мо, ки дар хориҷ аз кишвар ҳастанду пайваста ба халқу Ватани худ санги маломат мезананд, аслан ба сози манфиатҷӯён ва бадхоҳони миллату давлат мерақсанд. Чунин шахсон бо ниқоби “мухолифин” аз худ “дилсӯзи халқ” ё “ҳомии муҳоҷиру муаллим” сохта, тариқи шабакаҳои иҷтимоӣ кушиши бадном кардани фарзонафарзандони миллатро мекунанд. Лекин маълум аст, ки онҳо аллакай фирефтаи қувваҳои дигар буда, кайҳо боз ба ташкилоти террористӣ ё экстремистӣ пайвастаанд, - афзуд, Ш. Мансурова.
Ба таъкиди Суҳроб Амиршоев ҳар рўз мухолифат дар сомонаҳои иҷтимоӣ беист зиёд гардида, кӯшишу вокунишҳои дур аз ҳақиқат ва пучу бемантиқ ҳам меафзояд. Яъне қувваҳои зиёди беруна талош бар он доранд, ки аз ҳар ҷиҳат мардумро ба ваҳму таҳлука андохта, фазои орому осоиштаи кишварро халалдор созанд. Албатта, дасисаю кашмакашиҳои шабакаҳои иҷтимоӣ аз диди касе пинҳон нест. Барои исботи ҳар як руйдоду мавод аз далелҳои ҳақиқӣ истифода бояд кард.

Ба таъкиди профессор Назрӣ Офаридаев Тоҷикистон дар қатори дигар кишварҳои ҷаҳон бо зуҳуроти номатлуби терроризму ифротгароӣ муборизаи беамон мебарад.

“Оқибатҳои зуҳуроти болозикр ҳоҷати баён надоранд ва албатта бе таҳкими муносибатҳои созгори сиёсӣ байни давлатҳои ҷаҳон ин зуҳурот аз байн нахоҳад рафт. Онҳое, ки ба ҳаракату созмонҳои террористӣ ҳусни таваҷҷуҳ доранд, бояд ақли солимро кор фармуда, афкори ботилу дурўғпароканиро қотеъона маҳкум намоянд, - гуфт, профессор.

Аз ин рӯ, ватандӯстӣ натанҳо бо навишт, гуфтор ва васфу тарғиб бошад, балки кору амал, фаъолият, таҳкими рафоқат ва ташаббусҳои созандае мебояд, то меҳан рушду пешрафт кунад.