Таҳти ин унвон дар шаҳри Душанбе дар доираи нақша – чорабиниҳои Кумитаи кор бо ҷавонон ва варзиши назди Ҳукумати Ҷумуҳурии Тоҷикистон бахшида ба 33 – юмин солгарди Истиқлоли давлатӣ дар яке аз қисмҳои ҳарбии Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон, ҳамоиши хизматчиёни ҳарбӣ бо ҷалби ҷавонони синни даъватӣ баргузор гардид.

Дар ин бора аз дафтари матбуотии Кумитаи кор бо ҷавонон ва варзиши назди Ҳукумати Ҷумуҳурии Тоҷикистон хабар доданд.

Бино ба иттилои манбаъ зимни суҳбат бо сарбозону афсарон ва ҷавонони синни то даъватӣ гуфта шуд, ки бояд ҷавонони шуҷои Ватан бо азми дил баҳри пойдории сулҳу оромӣ, Истиқлолу озодӣ равонаи хизмати Модар-Ватан бошанд.

Ҳамзамон, пеш аз оғози ҳамоиш силоҳу аслиҳаи ҷангӣ ба намоиш гузошта шуда, миёни сарбозони қисми ҳарбӣ чорабиниҳои гуногуни варзишӣ, аз қабили шашкаву шоҳмот, бандкашӣ ва дастхобонӣ доир карда шуд.

Дар охири ҳамоиш ба ғолибони мусобиқа ва як қатор сарбозону афсарон Сипоснома ва туҳфаҳои хотиравии Кумитаи кор бо ҷавонон ва варзиши назди Ҳукумати Ҷумҳурии Тоҷикистон тақдим гардид.

Наҷиба МУРОДБЕКОВА, “ҶТ”