Савганде, ки шиори Азима дар зиндагӣ гаштааст

Ҳукумати кишвар баъди ба даст овардани Истиқлол ба занону ҷавондухтарон эътибори хосса зоҳир намуда, барои фаъолият дар ҳама соҳаҳо ва таҳсил дар дилхоҳ донишгоҳу донишкада шароитҳо муҳайё кардааст. Имрӯз дар кишвар занони лаёқатманду қавиирода, кордону ташаббускор дар тамоми соҳаҳо фаъолият карда истодаанд.

Азима Ақдодзода аз шумули он занони фаъоли кишвар аст, ки 19 сол боз дар Вазорати мудофиаи Ҷумҳурии Тоҷикистон ба ҳайси сардори зершуъбаи компютерии дастгоҳи вазир адои вазифа менамояд.

Ӯ нахуст табиб шудан мехост, то ҳамеша ба мардуми кишвар хизмати худро расонад. Аммо бо мурури замон ва хоҳиши падар хизмати худро ба халқаш на бо хилъати сафед, балки бо либоси низомӣ адо мекунад. Ҳамчунин, устодони мактаб низ ба Азима тавсия доданд, ки ҳуқуқшинос шавад ва дар оянда дар мақомотҳои қудратӣ фаъолият кунад. Ҳамаи суханони наздикон ва устодонаш ба ӯ неру бахшиду фаъ-олона дар озмуну олимпиадаҳои фаннӣ иштирок намуда, соҳиби ҷойҳои ифтихорӣ мегашт.

Ӯ пас аз хатми мактаби миёна на ба факултети ҳуқуқшиносӣ, балки ба факултети химия-биологияи Донишгоҳи шаҳри Хоруғ ҳуҷҷат супорида, онро сарбаландона хатм намуд. Баъдан, Академияи идоракунии назди Президенти Ҷумҳурии Тоҷикистонро бо ихтисоси менеҷери иқтисодӣ бомуваффақият хатм намуд.

Дар давоми таҳсил ӯ худро фақат бо либоси низомӣ тасаввур мекард ва зиёд кӯшиш мекард, то ба орзуяш расад. Ҳамин тавр, ӯ фаъолияти кориашро аввал аз шуъбаи маъмурӣ ва хоҷагидории Ситоди генералии Қувваҳои Муссалаҳи Ҷумҳурии Тоҷикистон ба ҳайси муҳосиб оғоз намуд.

- Ҳангоми ба кор шурӯъ карданам, шумораи занон хеле кам буд ва гоҳе фикр мекардам, ки дар интихоби касб иштибоҳ кардаам, аммо бо мурури замон меҳру муҳаббат нисбати касбам дучанд шуд. Худамро бо либоси низомӣ дида, дилам равшан ва дар фикрам ягона чиз ба мардум ва ватани худам софдилона хизмат кардан буд, - гуфт ин бонуи низомӣ.

Вақте ба орзуи худ расиду либоси низомӣ ба бар кард, бо азму иродаи қавӣ ба хизмати халқу Ватан пардохт. Чун илму ҳунар баҳри бекаронеро мемонаду ҳар қадаре бештар ба он ворид шавӣ, бояд бештар биомӯзӣ, ӯ низ чунин кард. Ин бонуи қавиирода ҳамеша ба он талош менамуд, то дар кору пайкораш муваффақ бошад.

Барои хизматҳои бенуқсон ва бисёрсола дар баланд бардоштани маҳорати касбӣ бо рутбаи ҳарбии подполковник сарфароз гардидааст, ки ин орзуи ҳар як корманди мақомоти қудратӣ мебошад.

- Ин ҳама аз заҳмату хизматҳои Сарвари ғамхори кишвар муҳтарам Эмомалӣ Раҳмон аст, ки тамоми қишри ҷомеа ба қадру қимат ва эҳтироми зан-модар ҳамчун сарчашмаи зиндагӣ мерасанд, – бо ифтихор изҳор намуд Азима Ақдодзода.
Вазифае, ки имрӯз Азима Ақдодзода бар уҳда дорад, хеле пурмасъулият аст ва ӯ лаҳзае бекор намемонад. Ҳамеша ба кор банд асту вазифа ва савганди ёдкардаашро содиқона иҷро мекунад.

Ӯ савганди ёдкардаи худро ба хотир оварда, гуфт: “Бароям бисёр мояи ифтихор буд, вақте дар назди чандин ҷавонмардони далеру ҷасур ман бо суханони “Ба Ватан содиқона хизмат мекунам!” савганди садоқат ба Ватану миллатро ба забон овардам, ки он савганд то имрӯз дар гӯшам садо медиҳад ва меҳру муҳаббатам нисбати Ватани маҳбубам ва касбам зиёд мегардад”.
Гарчанде кор дар соҳаи ҳарбӣ мушкил бошад ҳам, аммо барояш ифтихоровар аст ва давоми 19 соли фаъолият бо мушкиле рӯ ба рӯ нагаштааст, зеро ошиқи касби худ аст.

Азима бонуи ҳалиму меҳрубон буда, нисбат ба ҳамкасбонаш муомилаи хуб дорад. Ин хислаташ ӯро дар назди кормандон соҳибэҳтиром намудааст.

Ӯ аз Президенти кишвар муҳтарам Эмомалӣ Раҳмон сипосгузор аст ва сарбаландона мегӯяд: “Танҳо бо шарофати ғамхориҳои пайвастаи ин марди хирад, мо-занону духтарони деҳот, новобаста аз мушкилоти иқтисодию иҷтимоӣ, имкон пайдо намудаем, ки чи тариқи Квотаҳои президентӣ ва чи тариқи Маркази миллии тестӣ ба муассисаҳои олии таълимии кишвар дохил шуда, соҳиби касбу кори дилхоҳи худ гардем. Ҳамин гуна ғамхориҳост, ки фарзандони мо, насли ҷавони мо, дар дилхоҳ донишгоҳҳои бонуфузи дохил ва хориҷи кишвар таҳсил ва фаъолият мекунанд”.

Ин бону дар баробари корманди низомӣ будан, ҳамчунин дар тарбияи фарзандон низ хеле масъулиятшинос аст. Мехоҳад фарзанди ягонааш дар оянда номбардори ватан гардад.

- Бароям мушкил нест, ки ҳам дар мақомоти қудратӣ фаъолият мекунаму ҳам дар хона зан-модар ҳастам. Хушбахтам ва аз он меболам, ки чунин касбро соҳиб гаштаам, - гуфт бо чеҳраи кушод Азима.

Ӯ бисёр корманди фаъол буда, доимо барои пешравии соҳа ва хизмат ба халқи худ заҳмат мекашад. Ҳамкасбонаш низ ӯро чун бонуи кордону ботаҷриба, хушмуомила, меҳнатдӯсту дилбастаи касб иззату эҳтиром менамоянд. Чун Азима дар корҳои ҷамъиятӣ, чорабиниҳо фаъолона иштирок менамояд, заҳматҳояш борҳо бо сипосномаву ифтихорномаҳо қадрдонӣ гардидааст.

Азима Ақдодзода орзу дорад, то рутбаи генералӣ дар сафи Қувваҳои Мусаллаҳ хизмат намояд.
- Фикр мекунам, ки ин на танҳо орзуи ман, балки орзуи тамоми афсарону кормандони низомӣ аст, - гуфт ин бонуи низомӣ.

Наҷиба МУРОДБЕКОВА,“ҶТ”