12 октябр дар толори Донишгоҳи славянии Русияву Тоҷикистон ҳамоиши ҷумҳуриявии ҷавонони Тоҷикистон таҳти унвони “30 соли ҳамбастагии ҷавонон бо Пешвои миллат” баргузор гардид.

Ин ҳамоиш бо ибтикори Кумитаи кор бо ҷавонон ва варзиши назди Хукумати Ҷумҳурии Тоҷикистон бахшида ба 30-солагии таъсисёбии Иттифоқи ҷавонони Тоҷикистон доир гардида, дар он раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, раиси Иттифоқи ҷавонони Тоҷикистон Абдулло Раҳмонзода, муовини Сарвазири Ҷумҳурии Тоҷикистон Сатториён Матлубахон ва собиқадорони соҳа иштирок ва суханронӣ намуданд.

Дар оғози ҳамоиш Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ҳамаи иштирокчиёнро ба муносибати 30-юмин солгарди Иттифоқи ҷавонони Тоҷикистон (ИҶТ) табрик гуфта, аз ҷумла афзуд: “Ташкилоти ҷамъиятии Иттифоқи ҷавонони Тоҷикистон аз рӯзҳои аввали фаъолияти худ мавқеи устувори ҷавонони худогоҳу худшиноси кишварро барои дастгирӣ аз сиёсати дурандешона ва хирадмандонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сарҷамъ намуда, тавонист соли 1994 номзадии Пешвои миллат, муҳтарам Эмомалӣ Раҳмонро ба мансаби Президенти Ҷумҳурии Тоҷикистон дар Анҷумани худ пешниҳод ва дастгирӣ намояд. Давоми 30 соли фаъолияти худ ИҶТ ҳамчун ниҳоди ҷомеаи шаҳрвандӣ дар баробари ҳизбҳои сиёсӣ аз ташаббуси пешбарии номзад ба мансаби Президенти Ҷумҳурии Тоҷикистон фаъолона ва бо дастгирии аксарияти ҷавонони кишвар истифода бурда, сиёсати пешгирифтаи Пешвои муаззами миллатро мунтазам дастгирӣ карда, аз ташаббусҳои созандаи давлату Ҳукумати кишвар ва таъмини нақши устувори ҷавонони тоҷик дар пешрафт ва шукуфоии Тоҷикистони азиз ҳамовозӣ намояд” .

Инчунин номбурда илова намуд: “Имрӯз бо такя ба қувва ва неруи ҷавонон мо ҳадафҳои бунёдкоронаи имрӯзаю ояндаи худро баҳри татбиқи босамари сиёсати давлатии ҷавонон ба нақша мегирем ва ҷиҳати ноил гардидан ба он тамоми қувва ва тавони худро сафарбар намуда истодаем. Ҳукумати кишвар бо мақсади дастгирӣ ва ҳавасмандгардонии ҷавонони лаёқатманду саҳибмаърифат ва ватандӯсту хештаншинос дар даврони соҳибистиқлолии кишвар аз тамоми имкониятҳо истифода намуда истодааст. Иштироки фаъолонаи ҷавонон дар маъракаҳои муҳими сиёсӣ, аз ҷумла интихобот бозгӯи садоқатмандии онҳо баҳри рушди оянда ва босуботи Тоҷикистон мебошад. Албатта нақши ИҶТ ҳамчун неруи муттаҳидкунандаи ҷавонони кишвар дар барқарории сулҳу субот, таҳкими дӯстию рафоқат, тарғиби солимиву тавонмандӣ, рушди илму техника ва дигар бахшҳои ҳаёти ҷомеа хеле назаррас маҳсуб меёбад”.

Ҳамзамон муовини Сарвазири Ҷумҳурии Тоҷикистон Сатториён Матлубахон Паёми шодбошии Сарвари давлат муҳтарам Эмомалӣ Раҳмонро ба муносибати 30-солагии ИҶТ ба ҳозирин расониданд.

Дар идома инчунин Асрор Латифзода, муовини раиси ҲХДТ, Қосим Роҳбар, раиси Кумитаи рушди маҳали назди Президенти Ҷумҳурии Тоҷикистон ва Маликшо Неъматзода, раиси Федератсияи Иттифоқҳои касабаи мустақили Тоҷикистон ибрози назар намуданд. Онҳо зимни баромади хеш таъкид намуданд, ки ҷавонони кишвари соҳибистиқлол аз мактаби бузурги давлатдорӣ ва созандаи Пешвои миллат дарси ватандӯстӣ, одамияту худогоҳӣ меомӯзанд. Ҷавонон бояд равандҳои ҷаҳони муосирро пайваста эҳсос ва дарк намоянду дар рушди меҳан саҳм гузоранд.

Ҳамзамон намояндагони ташкилотҳои ҷавонони давлатҳои узви Иттиҳоди давлатҳои Мустақил ва Созмони ҳамкории Шанхай тариқи онлайнӣ баромад намуда, ҳамтоёни тоҷики худро табрик намуданд.

Дар охир изҳороти иштирокчиёни Ҳамоиши ҷумҳуриявии ҷавонон ироа гардида, онҳо миннатдории хешро ба Сарвари давлат баён намуданд.