Имрӯз дар асоси нақша-чорабиниҳои тасдиқгардидаи Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар саҳни Кумита чорабинии фарҳангию маърифатӣ, намоиш ва омӯзонидани хӯрокҳои миллӣ ҷиҳати омода намудани ҷавондухтарон ба ҳаёти мустақилона баргузор гардид.

Дар чорабинии мазкур кормандони Кумита ва беш аз 100 нафар ҷавондухтарон - хонандагони муассисаҳои таҳсилоти миёнаи умумии пойтахт ширкат варзиданд.

Шабнам Раҳимзода, муовини якуми раиси Кумитаи кор бо ҷавонон ва варзиш зимни суханронии худ қайд намуд, ки баргузории чорабинии имрӯза ба манфиати ҷавондухтарон буда, ба онҳо имкон медиҳад, ки бо тарзи омода намудани якчанд навъи таъомҳои миллӣ ошно гардида, дар оянда аз он истифода намоянд.

Инчунин, дар чорабинӣ ду бонуи бомаҳорат Сайфиддинова Маъмура ва Комилова Гулинор ба духтарон тарзи омода намудани таъомҳои миллӣ монанди қурутоб, шакароб ва оши буридаро нишон доданд.

Гуфта шуд, ки айни ҳол Кумитаи кор бо ҷавонон ва варзиш кӯшиш намуда истодааст, ки чорабиниҳои тарғиботию ташвиқотиро ҷиҳати ҷалби ҳарчи бештари ҷавондухтарон ба касбомӯзӣ, ҳунарҳои миллӣ ва омӯзиши забонҳои хориҷӣ роҳандозӣ намояд. Зеро духтарони моро лозим аст, баробари илмомӯзиву фаъолият инчунин аз нозукиҳои оиладорӣ огоҳ бошанду ба ҳаёти мустақилона устуворона қадам гузоранд. Чорабинӣ бо рақсу бозии иштирокчиён ба охир расид.

Гулафшон КАРИМОВА, “ҶТ”