Соли 2023 дар Маркази миллии қонунгузории назди Президенти Ҷумҳурии Тоҷикистон ду ҷаласаи Шурои илмӣ баргузор гардида, дар он масъалаҳои илмӣ мавриди баррасӣ қарор гирифтаву қарорҳои дахлдор қабул шудааст.

Ин нуктаро 2 феврал зимни нишасти матбуотӣ Саидзода Изатулло, директори Маркази миллии қонунгузорӣ баён намуд.

Номбурда гуфт, мақсади асосӣ аз баргузор намудани чунин ҷаласаҳо баланд бардоштани сатҳи малакаи тахассусии илмии кормандон ва тайёр намудани кадрҳои илмии соҳаи фаъолияти ҳуқуқэҷодкунӣ дар зинаҳои унвонҷӯӣ ва магистратура мебошад.

Таъкид гардид, ки ҳоло дар марказ 25 нафар ба ҳайси унвонҷӯ ва 14 нафар ба ҳайси магистр қабул гардида, бо мавзуи таҳқиқотӣ ва роҳбарони илмӣ аз ҳисоби олимони варзидаи соҳаи ҳуқуқ таъмин мебошанд.