Дирӯз дар меҳмонхонаи “Hyatt Regency”-и шаҳри Душанбе бахшида ба Рӯзи байналмилалии моликияти зеҳнӣ, ки ҳамасола 26 апрел дар саросари ҷаҳон ҷашн гирифта мешавад, Форуми байналмилалии ихтироъкорон ва навоварони Ҷумҳурии Тоҷикистон доир гардид.

Форум бо ташаббуси Муассисаи давлатии “Маркази миллии патенту иттилоот”-и Вазорати рушди иқтисод ва савдои Ҷумҳурии Тоҷикистон зери шиори “Ихтироот, аз ғоя то маҳсулот” ҷараён гирифта, дар он намояндагони вазорату идораҳо, олимони муассисаҳои илмию таълимӣ, мутахассисону коршиносони соҳавӣ, соҳибкорон ва намояндагони бахши хусусӣ ва ҳамзамон ихтироъкорони дохили кишвар ва берун аз он, бахусус аз Созмони умумиҷаҳонии моликияти зеҳнӣ, Ташкилоти патентии Авруосиё, Федератсияи Россия ва Ҷумҳурии Белорус иштирок доштанд.

Форум аз ҷаласаи тантанавӣ ва бахшҳо дар мавзуҳои “Ихтироот ва навовариҳо ва нақши онҳо дар рушди иқтисодиёти кишвар”, “Омӯзиш ва оммавигардонии ихтироот”, “Баҳогузории объектҳои моликияти зеҳнӣ ва имкониятҳои тиҷоратикунонии ихтироот” иборат буда, ширкаткунандагон тибқи мавзӯъҳои қаблан тасдиқшуда маърӯзаҳои пурмӯҳтаворо ироа намуданд.

Ҳамзамон дар доираи форум намоишгоҳи дастовардҳои ихтироъкорон баргузор гардида, буклет ва китобчаҳо (брошура) дар шакли маълумот доир ба ихтирооти бақайдгирифташуда барои меҳмонон пешниҳод гардид.

Гулафшон КАРИМОВА, “ҶТ”