Имрӯз дар “Кохи Суруш”-и шаҳри Душанбе бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон бахшида ба Рӯзи Президенти Ҷумҳурии Тоҷикистон консерти идона таҳти унвони “Бо Пешвои миллатем!” баргузор гардид.

Консерти мазкур дар доираи Нақшаи чорабиниҳои фарҳангиву фароғатӣ, маърифативу сиёсӣ ва оммавию варзишӣ бахшида ба Рӯзи Президенти Ҷумҳурии Тоҷикистон ва 31 - солагии Иҷлосияи таърихии 16-уми Шурои Олӣ баргузор гашта, дар он Матлубахон Сатториён, муовини Сарвазири Ҷумҳурии Тоҷикистон, Абдулло Раҳмонзода, раиси КҶВ, намояндагони Дастгоҳи иҷроияи Президент, вакилони Маҷлиси намояндагони Маҷлиси Олӣ, роҳбарон ва намояндагони вазорату идораҳо, олимону муҳаққиқон, шоиру нависандагон, варзишгарон, ҷоизадорони мусобиқаҳои байналмилалӣ, гирандагони Стипендияи президентӣ ва ҷавонони касбу кори гуногун иштирок карданд. 

Пеш аз оғози чорабинӣ Матлубахон Сатториён баромад намуда, дар суханронии худ аз хизматҳои шоёни Пешвои миллат ёдовар шуд.
Гуфта шуд, ки таҷлили чунин як рӯзи пуршукӯҳ барои ҳар як шаҳрванди бонангу ори кишвар бояд боиси фараҳбахшӣ бошад.
Сипас, қисмати фарҳангии чорабинӣ оғоз гардида, дар он ҳунармандони шинохтаи кишвар дар васфи Президент ва Тоҷикистони азиз сурудҳои баландмазмун сароиданд.

Ҳошим РАҲМАТУЛЛОЕВ "ҶТ"