Форуми байналмилалие, ки ҷавонони 5 давлатро дар Душанбе ба ҳам овард

12 июл дар меҳмонхонаи “Румӣ”-и шаҳри Душанбе Форуми байналмилалии ҷавонон зери унвони “Барои ояндаи босубот ва рушд якҷоя амал мекунем” баргузор гардид.

Форуми мазкур бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон гузаронида шуда, дар он Матлубахон Сатториён, муовини Сарвазири Ҷумҳурии Тоҷикистон, Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Мануэл Микаллер, сафири ИМА дар Тоҷикистон, Лутфия Абдулхолиқзода, муовини вазири маориф ва илми Ҷумҳурии Тоҷикистон, ҷавонони фаъоли кишварҳои Қазоқистон, Узбекистон, Тоҷикистон ва намояндагони вазорату идораҳои давлатӣ иштирок намуданд.

Баъд аз ифтитоҳи форум, нахуст Матлубахон Сатториён, муовини Сарвазири Ҷумҳурии Тоҷикистон баромад намуд. Ӯ зимни суханронии хеш иброз дошт: “Имрӯз дар ҷаҳон наздики 2 млрд. ҷавон зиндагӣ мекунанд. Ин шумора аз ҳама зиёд дар тули таърихи инсоният ба ҳисоб меравад. Қариб 90%-и ҷавонони ҷаҳон дар давлатҳои рӯ ба тараққӣ зиндагӣ ва фаъ-олият менамоянд. Аз ин рӯ, қисми зиёди аҳолии ҷаҳонро ҷавонон ташкил медиҳанд. Маҳз аз ҳамин сабаб СММ ба сиёсати ҷавонон мақоми махсус медиҳад. Яке аз Стратегияи ҷавонони СММ “Сулҳ ва афзоиш бахшидани рӯзгори устувор” ба ҳисоб меравад, ки ҷавонон ҳамчун суръатбахши сулҳу амният ва амалҳои башардӯстона эътироф карда мешаванд”.

Баъдан Абдулло Раҳмонзода, раиси Кумитаи кор бо ҷавонон ва варзиши назди Ҳукумати кишвар баромад намуда, саҳми ҷавононро дар рушди соҳаҳои гуногун дар давлатҳои рӯйи дунё муҳим арзёбӣ кард.

Дар идома таъкид шуд, ки ҷавонони Тоҷикистон ҳамеша зери таваҷҷуҳи Ҳукумати Ҷумҳурии Тоҷикистон ва роҳбарияти олии кишвар қарор дошта, барои рушду инкишофи неруи зеҳнию ҷисмонии онҳо пайваста тадбирҳои муҳим рӯи даст гирифта мешавад. Имрӯз барои аз худ кардани донишҳои мувофиқ ба талаботи замон дар Тоҷикистон кулли шароиту имкониятҳои зарурӣ муҳайё гардида, ҷавонон дар ҷавоб ба ин ҳама бо дасту дили гарм пайи омӯзиш ҳастанд ва баробари дигар қишрҳои ҷомеа саҳми худро дар рушду нумуи соҳаҳои мухталиф гузошта истодаанд.

Қайд гардид, ки маҳз ҷавонон метавонанд, бо неруи бузурги хеш дар рушди давлатҳои худ саҳми боризашонро гузоранду муаррифгари шоистаи меҳани хеш бошанд.

Сипас, ғолибони озмуни контенти беҳтарин аз рӯи лоиҳаи “Сафирони иродаи неки QLEVER барои Тоҷикистони осоишта” дар чорчубаи амалигардонии Стратегияи миллӣ оид ба пешгирии экстремизм ва терроризм дар вазъияти тантанавӣ қадрдонӣ гардиданд
.
Дар ҷараёни форум ҳамчунин намояндагони кишварҳои Қирғизистон ва Туркманистон ба таври онлайнӣ иштирок карда, андешаронӣ намуданд.

Дар охир иштирокчиёни форум перомуни мавзуи мавриди назар муҳокимаронӣ карданд.

Ф. САФАРОВА, “ҶТ”
Г. КАРИМОВА, коромӯзи “ҶТ”