Дар соли 2021 парванда ва дархосту пешниҳодҳои аз ҷониби Суди Олӣ, суди ВМКБ, судҳои вилоятҳои Суғду Хатлон, шаҳри Душанбе, судҳои ҳарбӣ ва шаҳру ноҳияҳои ҷумҳурӣ баррасишаванда ба 144554 адад расидааст, ки нисбат ба соли 2020-ум 9942 адад зиёд мебошад.

Дар ин бора раиси Суди Оли Ҷумҳурии Тоҷикистон Шермуҳаммад Шоҳиён зимни нишасти хабарӣ ба намояндагони воситаҳои ахбори омма иттилоъ дод.

Ҳамчунин гуфта шуд, ки аз шумораи умумии парвандаҳои баррасигардида, дар марҳилаи якум 13031 ададро парвандаҳои гражданӣ, 49296 ададро парвандаҳои оилавӣ, 10942 ададро парвандаҳои ҷиноятӣ, 44218 ададро парвандаҳои ҳуқуқвайронкунии маъмурӣ, 7596 ададро дархостҳои мақомоти тафтиши пешакӣ ва 10512 ададро пешниҳоди муассисаҳои ислоҳӣ, Хадамоти иҷро ва дигар ташкилоту муассисаҳо ташкил медиҳанд.