Чанде пеш Ассотсиатсияи миллии занҳои соҳибкори Тоҷикистон бо иштироки баҳрагирандагони худ ва намояндагони мақомоти давлатию кормандони воситаҳои ахбори омма дар меҳмонхонаи “Рамз”-и шаҳри Қӯрғонтеппа нишасти матбуотӣ баргузор намуданд.

Нишасти хабарии мазкур оид ба сафари омӯзишӣ ва мубодилаи таҷрибаи соҳибкорзанон дар ҷумҳуриҳои Ӯзбекистону Гурҷистон буда, дар чаҳорчӯбаи Лоиҳаи USAID “Соҳибкории бонувон воситаи васеъ намудани ҳуқуқ ва имкониятҳои занон” доир гардид.

Бо сухани ифтитоҳӣ кори нишасти матбуотиро Муҳаббат Нозимова аз номи роҳбарияти Ассотсиатсияи миллии занҳои соҳибкори Тоҷикистон оғоз бахшида, ҳозиринро хайрамақдам гуфт. Сипас, кормандони Ассотсиатсияи миллии занҳои соҳибкори Тоҷикистон доир ба сафарҳои омӯзишии бонувон ба ҳозирин иттилоъ дода, аз бардошҳояшон нақл намуданд.

Раъно Раҳимзода, сардори Раёсати кор бо занон ва оилаи мақомоти иҷроияи ҳокимияти давлатии вилояти Хатлон, зимни суханронии худ Ассотсиатсияи миллии занҳои соҳибкори Тоҷикистон ва лоиҳаи мазкурро баҳамоварандаи соҳибкорзанони кишвар номид.

Фақир Саъдуллоев, мудири шуъбаи иттилоотӣ ва таҳлилии дастгоҳи раиси вилояти Хатлон, низ аз ҳамкориҳои Ассотсиатсияи миллии занҳои соҳибкори Тоҷикистон бо расонаҳои хабарӣ изҳори хушнудӣ намуда, онро дар тарғиби фаъолияти соҳибкории бонувон муҳим арзёбӣ намуд.

Ҳамин тавр миёни иштирокчиёни нишаст ва рӯзноманигорон саволу ҷавоб сурат гирифта, бонувон оид ба сафарҳои омӯзишии худ маълумот доданд.

Умед МИРЗОЕВ, “ҶТ”