Имрӯз таҳти ин унвон дар маркази маъмурии Вилояти Мухтори Кӯҳистони Бадахшон роҳпаймоии оммавӣ бахшида ба Рӯзи Президенти Ҷумҳурии Тоҷикистон доир гардид.

Дар роҳпаймоӣ зиёда аз 5 ҳазор нафар сокинони вилоят, аз ҷумла қишри калонсол, ҷавонону занон, варзишгарон, омӯзгорон ва хонандагони муассисаҳои таҳсилоти ҳамагонӣ, устодону донишҷуёни муассисаҳои олӣ, кормандони идораву муассисаҳои вилоятию шаҳрӣ, сарбозони қисмҳои низомӣ дар вилоят, кормандони мақомоти ҳифзи ҳуқуқ ва қудратӣ иштирок намуданд.

Иштирокчиёни чорабинӣ аз назди Варзишгоҳи марказӣ то майдони Исмоили Сомонӣ бо шиору овезаҳои ватандӯстона, аксҳои Пешвои миллат, қаҳрамонони Тоҷикистон ва Парчам роҳ паймуданд.

Дар маросими расмӣ, муовини якуми раиси ВМКБ Сафарзода Шарифхон Нураҳмад ва раиси шаҳри Хоруғ Назарзода Ризо Шодӣ ҳозиринро бо Рӯзи Президенти Ҷумҳурии Тоҷикистон табрику таҳният гуфтанд.

Зикр гардид, ки имрӯз ҷаҳониён дар симои Эмомалӣ Раҳмон Тоҷикистонро мешиносанд ва агар Тоҷикистон гӯянд, симои ин шахсияти бузурги таърихӣ, Пешвои тоҷикони ҷаҳон пеши назарашон меояд. Эмомалӣ Раҳмон дар асри ХХI дар қатори намоёнтарин ва тавонотарин шахсиятҳои сиёсати ҷаҳонӣ қарор дошта, чун сиёсатмадору роҳбари хирадманд маҳбубтарин чеҳра миёни тоҷикони ҷаҳон ва яке аз сарварони шинохтаи кишварҳои дунё эътироф гардидааст.

Садоншо ҶАНОБИЛШОЕВ,
“ҶТ”