Паёми шодбошии Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба ифтихори Рӯзи ҷавонони Тоҷикистон

Ҷавонони сарбаланди Тоҷикистони соҳибистиқлол.
Неруи бузургу пешбари ҷомеа.
Пайравони Пешвои миллат!

Дар ибтидо ҳамаи Шуморо бахшида ба Рӯзи ҷавонони Тоҷикистон, ки дар фазои сулҳу субот, баракати даврони соҳибистиқлолии мамлакат ва дар рӯҳияи ватандӯстиву хештаншиносӣ бо дастовардҳои назаррас истиқбол менамоем сидқан шодбош менамоям ва барятон ҳаёти пур аз нишоти ҷавонӣ таманно дорам.

Воқеан имсол мо шоҳиди он гардидем, ки зери сиёсати хирадмандона ва дурбинонаи Пешвои маҳбуби миллат, муҳтарам Эмомалӣ Раҳмон ва ҳукумати мамлакат давоми як моҳ аст, дар тамоми шаҳру ноҳияҳои кишвар тантанаҳои ҷавонӣ идома дорад ва Тоҷикистони азизи мо рӯз аз рӯз ба дастовардҳои бузургу бесобиқа ноил гардида истодааст.

Бо шарофати сиёсати дурбинонаву хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сиёсати давлатии ҷавонон аз солҳои аввали соҳибистиқлолӣ яке аз самтҳои афзалиятноки фаъолияти Ҳукумати кишвар пазируфта шуда, баҳри дастгириву пуштибонии насли ояндасоз ва қишри меҳварии ҷомеа таваҷҷӯҳи ҳамешагӣ зоҳир карда мешавад. Қабул ва мавриди амал қарор гирифтани силсилаи санадҳои меъёриву ҳуқуқии соҳа, стратегияву барномаҳои давлатӣ, таъсис додани стипендияҳо, квота ва ҷоизаҳои Президентӣ барои ҷавонон, роҳандозӣ гардидани иқдомҳои шоиста дар самти дастгирии ҳамешагии ташаббусҳои неку наҷиби ҷавонони соҳибистеъдод ва амсоли инҳо, таъсиси Шӯрои миллии кор бо ҷавонон дар назди Президенти Ҷумҳурии Тоҷикистон ва дигар тадбирҳо шаҳодати ғамхориҳои пайвастаи давлату Ҳукумат нисбат ба насли ҷавони кишвар мебошад.

Маҳз иродату садоқат ва кӯшишу талошҳои ҷавонпарваронаи Сарвари давлат муҳтарам Эмомалӣ Раҳмон аст, ки иқдомҳои шоистаи ҷавонон ва беҳтарин ташаббусҳои созандаи онҳо пуштибонӣ ёфта, ҷавонони мо муваффақона дар самтҳои гуногуни рушди иқтисодиву иҷтимоии мамлакат сарбаландона фаъолият намуда истодаанд. Ин аст, ки зимни яке аз суханрониҳояшон Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бамаврид иброз намуданд: “Ҳоло мо метавонем дилпурона изҳор дорем, ки ҷавонони кишвар низ бо истифода аз шароити барои онҳо фароҳамовардаи давлат ва Ҳукумати мамлакат вазифаҳои худро бо масъулияти баланд дар назди ҷомеа иҷро менамоянд ва ҳамчун насли ташаббускору ояндасоз дар саросари мамлакат ба корҳои бунёдгаронаву созанда машғул мебошанд”.

Воқеан, ҷавонони ҳамсоли Истиқлол имрӯз мактабҳои олиро хатм кардаву дар соҳаҳои гуногун ба фаъолият пардохтаанд. Онҳо, ки диду нигоҳи муосир доранд, дар зудтар ташаккул ёфтани давлат ва эъмори ҷомеаи демократӣ саҳм хоҳанд гузошт.
Мақоми иҷтимоӣ ва сиёсии ҷавонон на фақат неруи демократии ҷомеа ва давлат, балки хусусиятҳои таҳаввулот, стратегияи тараққиёт ва ояндаи кишварро муайян мекунад.

Нақш ва иштироки ҷавонон дар сиёсат, рушди соҳаҳои иҷтимоӣ, иқтисодӣ ва фарҳангӣ назаррас буда, дар баробари ба даст овардани Истиқлолияти давлатӣ сиёсати давлатии ҷавонон ҳамчун самти афзалиятноки фаъолияти Ҳукумат муқаррар гардид ва ҳоло он тавассути қабули барномаҳои миёнамуҳлати соҳавӣ татбиқ шуда истодааст.

Маҳз тавассути татбиқи сиёсати давлат нисбат ба ҷавонон ҳалли масъалаи муҳиму ҳалкунандаи ҷомеа – тарбияи насли ояндаи дорои тафаккури созандаву ахлоқи ҳамида ва танзиму тарҳрезии ояндаи устувори ҷомеаро таъмин намудан имконпазир аст.

Дар даврони соҳибистиқлолӣ ба миллати тоҷик, бахусус ҷавонон муяссар шуд, ки дар соҳаҳои муҳим ва афзалиятнок донишу маҳорати худро такмил дода, дар арсаҳои гуногун давлату миллати худро муаррифӣ ва ҳимоя намоянд. Иштироки ҷавонон дар чорабиниҳои муҳими сиёсию иҷтимоӣ ва фарҳангии байналмилалӣ далели ин гуфтаҳост. олибияти хонандагони муассисаҳои таҳсилоти миёна ва олии кишвар дар олимпиадаҳои минтақавию байналмилалӣ, дастболо шудани варзишгарони тоҷик ва парафшон шудани Парчами миллии Тоҷикистон дар мусобиқоти минтақавию ҷаҳонӣ меваи самари Истиқлолият аст, ки давлату миллати тоҷик аз шаҳди он лаззат мебаранд.

Рӯй овардан ба илм, илмомӯзӣ ва бахусус илмҳои табиатшиносӣ, дақиқ ва риёзӣ, забономӯзӣ ва аз худ кардани техникаву технологияи замонавӣ, барои рушди устувори иқтисоди мамлакат ва таъмини рақобатпазирии кишвар дар арсаи ҷаҳон қадами устувор мегузорад.

Ҳадафи асосии мо масъулини соҳаи кор бо ҷавонон ва тамоми сохторҳои идеологии кишвар, пеш аз ҳама тарбия намудани насли худшиносу худогоҳ, донишманду созанда, соҳибмаълумоту соҳибкасб ва бо ин роҳ ба вуҷуд овардани заминаи боэътимод барои ҷомеаи ояндаи Тоҷикистон мебошад.

Аз ин рӯ, ҷиҳати тарғибу ташвиқи ғояҳои давлати демократӣ, баланд бардоштани маърифати сиёсию ҳуқуқии ҷавонони кишвар, тарғиби тарзи ҳаёти солим дар миёни ҷавонон, муқовимат ва пешгирӣ аз интишори ақидаҳои ифротӣ ва харобкорона, аз байн бурдани таҳдидҳои замони муосир, ҷалби ҷавонон дар бунёди ҷомеаи шаҳрвандӣ, ба таҳсили илм фаро гирифтани онҳо, ҳамчун насли меҳнатдӯсту қавиирода ба камол расидани онҳо дар ҷомеа тамоми масъулияти хешро равона созем.
Дар баробари ин, ҳоло дар назди ҷавонон масъалаҳое қарор доранд, ки дар замони ҷаҳонишавӣ дарку ҳалли онҳо аз ҷавонони мо дониши амиқ, ҷаҳонбинии замонавӣ ва муҳимтар аз ҳама, ҳисси баланди миллӣ, худогоҳиву худшиносӣ ва самимона дӯст доштани Ватанро талаб менамояд.

Имрӯз дар раванди ҷаҳонишавӣ мубориза ба густариши ақидаву афкори гуногуни бегонагон бидуни мавҷудияти ақидаи устувор дар кадом соҳае, ки набошад, ғайриимкон аст. Пешгирӣ кардан аз ифротгароию тундгароӣ, терроризм ва экстремизм яке аз омилҳои муҳими ҳифзи миллат, ваҳдату ягонагӣ, сулҳу суббот ва рушди кишвари азизамон мебошад.

Мову Шумо имрӯз, ки дар фазои ваҳдату субот ва рушди кишвари озодамон камол ёфтаем, уҳдадорем, ки Тоҷикистони соҳибистиқлолро чун амонати бузурги миллат ҳифзу тавсеа намуда, бо кору амали созанда ва фидокоронаи худ ҳамчун кишвари ободу пешрафта ба наслҳои минбаъда мерос гузорем.

Пурарзиштарин иқдоми ҷавонони имрӯза саъю кӯшиши ҷиддӣ дар боби такомули ақлонӣ ва илмӣ бояд бошад.
Мову Шумо имрӯз, ки дар фазои ваҳдату субот ва рушди кишвари озодамон камол ёфтаем, уҳдадорем, ки Тоҷикистони соҳибистиқлолро чун амонати бузурги миллат ҳифзу тавсеа намуда, бо кору амали созанда ва фидокоронаи худ ҳамчун кишвари ободу пешрафта ба наслҳои минбаъда мерос гузорем.

Умедвор ҳастам, ки мову Шумо ҷавонони хуштолеи кишвар ба қадри заҳмату меҳнатҳои Пешвои муаззами миллат ва давлату Ҳукумати кишвар дар роҳи ҳифзи дастовардҳои даврони соҳибистиқлолӣ расида, бо виҷдони пок ва дили соф ҷиҳати ҳимоя намудани манфиатҳои миллӣ ва баҳри таҳкими зиндагии шоистаи мардум талош менамоем.

Бори дигар ҳар яки Шуморо ба Рӯзи ҷавонони Тоҷикистон сидқан табрик намуда, бароятон комёбӣ, пешрафт ва дар талошу кӯшишатон ҷиҳати ободии Тоҷикистони азиз муваффақиятҳои навро таманно дорам.

Рӯзи ҷавонони Тоҷикистон муборак!