Дар Тоҷикистон аввалин маротиба ҷарроҳии саратони бачадон ва саратони гурда анҷом дода шуд.

Ҷарроҳиҳои мазкур аз ҷониби мутахассисони Муассисаи давлатии “Маркази ҷумҳуриявии илмии саратоншиносӣ”-и Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, ки дар муассисаҳои илмию хизматрасонии давлатҳои пешрафтаи ҷаҳон таҷриба андӯхтаанд, амалӣ гардидааст.

Гуфта мешавад, қаблан чунин ҷарроҳиҳо дар хориҷи кишвар анҷом дода мешуд, ки сарфи маблағи зиёдро талаб мекард. Аммо ба кишвар ворид шудани таҷҳизоти эндовидеоӣ ба табибон имкон дод, то чунин ҷарроҳиҳои мураккабро бо вақти каму нархи дастрас анҷом диҳанд.Таҷҳизоти мазкур истеҳсоли давлати Олмон буда, ба воситаи он ҷарроҳиҳо, хусусан ҷарроҳии саратони гурдаро метавон осон амалӣ кард.

Ҷарроҳии саратони гурда, ки бо усули эндовидеолапороскопӣ анҷом дода шуд, ба арафаи Соли нави мелодӣ рост омада, он дастоварди бузург дар соҳаи тибби кишвар дониста мешавад.