Дар намоишгоҳи байналмилалии боғдорӣ “ЭКСПО - 2019”, ки дар шаҳри Пекини Ҷумҳурии Мардумии Чин баргузор гардида истодааст, Павилиони Ҷумҳурии Тоҷикистон амал карда истода, он ки аз 29 апрел оғоз шудааст, то 7 октябр идома хоҳад кард, - итиллоъ дод Ҷамшед Ҷумъахонзода, раиси Палатаи савдо ва саноати кишвар, санаи 17 июл, зимни нишасти матбуотӣ.

Ба таъкиди номбурда дар Павилиони Ҷумҳурии Тоҷикистон истеҳсолкунандагони маҳсулотҳои ватанӣ дар соҳаҳои боғдорӣ, асалпарварӣ, кишоварзӣ, ҳунарҳои мардумӣ маҳсулоти худро муаррифӣ менамоянд, ки аз оғоз то кунун  аз гӯшаи Тоҷикистон зиёда аз як миллион нафар шаҳрвандони хориҷӣ дидан намуданд. 

Дар идома гуфта шуд, айни замон Палата аъзои ташкилотҳои байналхалқӣ, аз ҷумла аъзои Федератсияи Палатаи ҷаҳонӣ (WCF), Палатаи байналмилалии тиҷоратӣ (ICC),  Палатаи савдо ва саноат ва кишоварзии исломӣ (ICCAI), давлатҳои минтақаи уқёнуси ором, давлатҳои аъзои СҲИ (ECO) буда, мунтазам ба чорабиниҳои байналхалқӣ сафарбар карда мешавад. Баҳри вусъат бахшидан ба фаъолияти корӣ Палатаи савдо ва саноати кишвар 19 созишномаҳои ҳамкорӣ бо як қатор  шарикони хориҷии худ, аз ҷумла Палатаи савдо ва саноати Ҷумҳурии Тотористон, Белорусия ва Руминия ба имзо расонидааст.

Ҷамшед Ҷумъахонзода зикр кард, ки алҳол Палатаи савдо  ва саноати Ҷумҳурии Тоҷикистон  дар ҳамкорӣ бо дигар  вазорату идораҳо барои дар сатҳи баланд гузаронидани Рӯзи миллии Тоҷикистон, ки охири моҳи август дар доираи Намоишгоҳи байналмилалии боғдорӣ  “EXPO-2019” доир мегардад,  омодагии ҷиддӣ дида истодааст.