Кормандони Шуъбаи корҳои дохилаи ноҳияи Сино як сокини шаҳри Душанберо, ки такроран ба амалӣ фолбинӣ машғул шудааст, дастгир намудаанд.

Дар ин бора Раёсати ВКД дар шаҳри Душанбе хабар дод.

Шаҳрванд Наимова Зуҳро чандбин бор ба хотири ин амалҳои хурофотӣ, аз ҷумла фолбинию ҷодугарӣ ба ҷавобгарӣ кашида шудааст, аммо аз амали худ даст накашида, такроран ба ин кори ғайриқонунӣ даст задааст.

Номбурда шаҳрвандонро дар манзили истиқоматиаш барои иҷрои амалҳои хурофотӣ қабул намуда, тавассути ин кор зиндагии худро пеш мебурдааст. Ба гуфтаи масъулини Раёсати ВКД дар шаҳри Душанбе нисбати Зуҳро Наимова парвандаи ҷиноятӣ боз шуда, тибқи талаботи моддаи 240, иловаи 1 Кодекси ҷиноятии Ҷумҳурии Тоҷикистон тафтишоти пешакӣ идома дорад.

Мувофиқи ин моддаи Кодекси ҷиноятӣ нисбати фолбиноне, ки баъди татбиқи ҷазои маъмурӣ дар давоми сол такроран ба ин кирдор даст мезаданд ба андозаи аз як ҳазору панҷсад то ду ҳазор нишондиҳанда ҷарима барои ҳисобҳо ё маҳрум сохтан аз озодӣ ба муҳлати аз як то ду сол ҷазо дода мешаванд.

Ёдовар мешавем, ки чанде пеш Вазорати корҳои дохилии кишвар ба шаҳрвандон ҳушдор дод, то аз рафтан ба назди фолбинону ҷодугарон даст кашанд. Ин ниҳод бо нашри як изҳорот дар сомонаи расмии худ аз бовару эътиқод доштани баъзе шаҳрвандон ба сеҳру ҷодуи фолбинону ҷодугарон ва рафтан ба назди онҳо нигаронӣ намуда, гуфта буд, ки минбаъд барои чунин нафарон аз сӯи вазорат чораандешӣ мегардад.

Шаҳодат ХОЛОВА, "ҶТ"