Бинобар сабаби тасарруфи маблағҳои шаҳрвандон тариқи телефон Сумая Носирова дастгир карда шуд. Дар ин бора Раёсати ВКД дар шаҳри Душанбе иттилоъ дод.

Тибқи иттилои масъулини Раёсати ВКД дар шаҳри Душанбе номбурда ҳангоми дар дохили маркази савдои “Садбарг” қарор доштанаш бо тариқи пинҳонӣ аз ҳамёни электронии як нафар савдогар маблағи 4490 сомониро тасарруф намудааст. Ҳамчунин, 18-уми январи соли ҷорӣ аз ҳамёни электронии як нафар корманди маркази савдои “Шоҳмансур” 7190 сомониро ба ҳамёни электронии худ гузаронидааст.

Дар натиҷаи санҷишҳо муайян гардид, ки номбурда тасарруфи маблағҳои шаҳрвандонро аз худ намуда, бо ҳар роҳу восита рамзи ҳамёни электронии шаҳрвандонро ба телефони мобилии худ пайваст намуда, маблағҳои шаҳрвандонро ба корти бонкии худ интиқол медодааст.

Гумонбаршаванда Носирова Сумая дар ҳабси пешакӣ қарор дошта, бо мақсади муайян намудани даст доштан дар дигар ҳолатҳои ҷиноят, тафтишот идома дорад.

Таҳмина ЮСУФӢ, “ҶТ”