- Тибқи омӯзиши геологӣ дар ВМКБ якчанд нуқтаҳои сангҳои ороишии қиматбаҳо ошкор карда шуд. Дар натиҷаи гузаронидани корҳои ҷустуҷӯию аксбардорӣ баъд аз гирифтани намунаҳо таҳлилҳо нишон дод, ки миқдори тилло дар ин майдонҳо зиёд аст, - гуфт Илҳомҷон Оймуҳаммадзода, сардори Саридораи геологияи тоҷик 4 август зимни нишасти матбуотӣ.

Ҳамчунин ӯ таъкид намуд, ки корҳо аз ҷониби зерсохторҳои Саридораи геология дар самти ҷустуҷӯи обҳои зеризаминӣ амалӣ шудаанд. Ин тадбирҳо бо мақсади бо оби нӯшокӣ таъмин намудани муассисаҳои тандурустӣ ва соҳаи маориф дар вилоятҳои Хатлону Суғд ва ноҳияҳои тобеӣ ҷумҳурӣ мебошад.

Ба гуфтаи ӯ дар 6 моҳи соли равон дар ҷамоати деҳоти Лолазори ноҳияи Данғара чоҳ дар жарфи 50 метр парма карда шуд. Ҳамчунин дар деҳаи Ибрати ҷамоати деҳоти Тугараки ноҳияи Восеъ барои бо об таъмин кардани МТМУ №24 ва бунгоҳи тиббӣ чунин тадбир амалӣ шуд. Тибқи нақша дар 6 моҳи минбаъда дар вилояти Суғд 2 чоҳи дигар кофта хоҳад шуд.

Таҳмина ЮСУФӢ, “ҶТ”