Тавре маълум аст, аст 22 июли соли бо фармони Президенти Ҷумҳурии Тоҷикистон, Пешвои миллат, Сарфармондеҳи Олии Қувваҳои Мусаллаҳи Тоҷикистон, генерали артиш муҳтарам Эмомалӣ Раҳмон бо ҳадафи санҷидани омодабошии ҷангии ҷузъу томҳо бори аввал дар таърихи давлати соҳибистиқлоли Тоҷикистон чорабинии ҳарбии "Марз - 2021" баргузор гардид.

Дар маркази Вилояти Мухтори Кӯҳистони Бадахшон, шаҳри Хоруғ бошад чорабинӣ бо иштироки муовини Раиси Маҷлиси миллии Маҷлиси Олии Ҷумҳурии Тоҷикистон, раиси вилоят Ёдгор Файзов, муовини вазири Мудофиаи кишвар, роҳбарияти шаҳр, комиссари ҳарбии ВМКБ, роҳбарони сохторҳои низомиву қудратӣ, ҳайати шахсии афсарону сарбозон, кормандони мақомоти иҷроияи ҳокимияти давлатии вилояту шаҳр, идораву муассисаҳои маҳаллӣ ва ҳайати захираҳои сафарбарӣ доир шуд.

Дар "Марз - 2021" – и маркази вилоят техникаву лавозимоти зиреҳпӯши ҷангӣ, техникаи автомобилӣ ва махсус, чархболҳои ҷангӣ дар самтҳои амалиётиву минтақаҳои иҷрои вазифаи ҷангӣ бароварда шуданд.
Раиси вилоят дар ҷараёни чорабинӣ махсус таъкид намуд, ки кишвари маҳбубамон - Тоҷикистон соли ҷорӣ 30-юмин солгарди Истиқлолияти давлатиро таҷлил менамояду ин неъмати воло ҳарчанд замони аз байн рафтани собиқ Иттиҳоди Шӯравӣ ба миллати мо расида бошад ҳам, аммо ҳифзи он аз рӯзҳои нахустин барои тоҷикистониён хеле гарон афтод.

"Аз рӯзҳои аввали соҳибистиқлолӣ қувваҳои муғризи дохилӣ, бо таҳрику пуштибонии хоҷагони хориҷӣ, манфиатҳои шахсию гурӯҳии худро аз манфиатҳои миллию давлатӣ боло гузошта, ҷомеаро ба ҷанги таҳмилии шаҳрвандӣ кашонданд. Аз ин вазъият гурӯҳҳои ҷинояткори фаромиллӣ ва ифротӣ истифода бурда, ба қочоқи маводи мухаддир, силоҳ ва одамрабоию кирдорҳои дигари номатлуб даст заданд. Ҳастии давлату ягонагии миллати тоҷик таҳти суол қарор гирифт. Хушбахтона, дар заминаи хиради аҷдодӣ талошҳои пайгиронаи фарзонафарзандон парчами номуси миллат барафрохта шуда, бо баргузории Иҷлосияи таърихии 16-уми Шӯрои Олӣ ва интихоби Роҳбарияти олии кишвар таҳти сарварии Пешвои муаззами миллат муҳтарам Эмомалӣ Раҳмон давлату халқият ба ҳам омаданд" - иброз намуд, раиси вилоят Ёдгор Файзов.

Номбурда дар идомаи суханронӣ тавзеҳ дод, ки хосса дар марҳилаи ҳозира вазъи сиёсию иқтисодии ҷаҳону минтақа хеле печида гардида, муносибатҳои абарқудратҳо барои тақсимоти нави ҷаҳонӣ шиддат меёбад. Аз ин рӯ, ҳифзи сарҳади давлатӣ ва таъмини амнияти шаҳрвандон масъулияту муносибати навро тақозо менамояд.
- Ба назардошти ин ва дигар ҷанбаҳои амниятӣ Ҳукумати Тоҷикистон дар солҳои соҳибистиқлолӣ барои ташаккулу такомули иқтидори мудофиавии давлат ва Қувваҳои Мусаллаҳи он аз тамоми имкониятҳо истифода бурд. Масалан, барои омода намудани ҳайати кадрӣ академияю донишкадаҳо ва литсейю гимназияҳои соҳавӣ кушода гардида, ҷузъу томҳои ҳарбӣ бо ҳазорҳо афсарони ҳирфаӣ таъмин гардиданд. Дар ҳайати Қувваҳои Мусаллаҳ ҷузъу томҳои гуногун таъсис ёфта, бо таҷҳизоти наву замонавӣ муҷаҳҳаз гардиданд, - зикр кард, раиси вилоят.

Қайд гардид, ки танҳо барои таъмини ҳимояи сарҳади давлатӣ дар радифи раёсату отрядҳо 158 дидбонгоҳи сарҳадӣ ва наздики 190 иншооту биноҳои ёрирасон бунёд карда шуданд. Аз ҷумла, дар Вилояти Мухтори Кӯҳистони Бадахшон, ки сарҳади тӯлонӣ бо Ҷумҳурии исломии Афғонистон дорад, иқтидори Қушунҳои сарҳадӣ бамаротиб таҳким ёфта, кор дар ин самт идома дорад.

“Бо хоҳиши худ ба сафи Қувваҳои Мусаллаҳ пайвастани даъватшавандагон ва теъдоди зиёди довталабон ҷиҳати дохилшавӣ ба донишкадаҳои ҳарбию низомӣ аз он гувоҳӣ медиҳанд, ки сатҳи ҳуввияти миллӣ ва ватандӯстии ҷавонон дар ҷараёни болоравӣ қарор дорад”, - афзуд раиси вилоят.
Мавриди қайд аст, “Марз – 2021” дар сатҳи тамоми шаҳру ноҳияҳои ВМКБ доир шуда, соати ҳафти субҳ бо натиҷаҳои баланд ҷамъбаст гардид.