Қарор аст, дар арафаи ҷашни байналмилалии Наврӯз телевизиони “Сайёҳӣ ва ҳунарҳои мардумӣ” дар кишвар ба фаъолият шурӯъ мекунад.

Дар ин бора 8-уми феврал зимни нишасти матбуотӣ Нуриддин Саид, раиси Кумитаи телевизион ва радиои назди Ҳукумати Ҷумҳурии Тоҷикистон иттилоъ дод.

“Айни ҳол дар Муассисаи давлатии телевизиони “Сайёҳӣ ва ҳунарҳои мардумӣ” корҳои таъмиру навсозӣ, инчунин кашонидани хати нахи нурӣ то ба бинои марказии интиқоли мавҷҳои радио ва телевизионии №1 бо дарозии 900 метр, гузаронидани оби гарм ва хатҳои телефон ҷараён дошта, он бо дастгоҳу таҷҳизоти замонавии истеҳсоли Аврупо муҷаҳҳаз мегардад, ки дорои сифат ва дақиқияти баланди пахши навору садо мебошанд”, - иброз дошт Нуриддин Саид.

Тибқи фармоиши Ҳукумати Ҷумҳурии Тоҷикистон Муассисаи давлатии телевизиони “Сайёҳӣ ва ҳунарҳои мардумӣ” дар собиқ бинои Пажӯҳишгоҳи давлатии илмӣ-тадқиқотии саноати Вазорати саноат ва технологияҳои нав буда, дорои беш аз 40 ҳуҷраи корӣ мебошад.