Филиали ҶСК “Шабакаҳои тақсимоти барқ” дар шаҳри Бохтар дар шашмоҳаи соли равон нисбати 6 корхонаи қарздор маводҳо тартиб дода, барои чораҷӯӣ ба мақомоти прокуратура пешниҳод кардааст.

Дар ин бора сармуҳандиси ҶСК “Шабакаҳои тақсимоти барқ” дар вилояти Хатлон Раҷабалӣ Бояков 3 август зимни нишати хабарӣ иттилоъ дод.

Ӯ гуфт, ки нисбати ин 6 корхона ба маблағи умумии 7 млн. 121 ҳазору 584 сомонӣ санад тартиб дода шуда, аз ин 482 ҳазору 308 сомониаш ба фоидаи ҶСК “Шабакаҳои тақсимоти барқ” дар шаҳри Бохтар рӯёнда шудааст.

- Дар суди иқтисодии вилоят маводҳо нисбати 6 корхонаи қарздор ба маблағи 482 ҳазору 308 сомонӣ баррасӣ шуда, ба манфиати филиали ҶСК “Шабакаҳои тақсимоти барқ” дар шаҳри Бохтар ҳал гардиданд,-гуфт номбурда.

Ҳамзамон зикр гардид, ки дар ин давра ба 70 корхона барои қардзорӣ ба маблағи 17 млн. 858 ҳазор 243 сомонӣ иддао пешниҳод карда шуд. Дар асоси талаботҳои даъвогӣ ба суратҳисоби корхона 10 млн. 966 ҳазору 437 сомонӣ ворид гаштааст.