Имрӯз дар Донишгоҳи давлатии тиҷорати Тоҷикистон бо мақсади расонидани нуктаҳои муҳими Паёми ахири Президенти Ҷумҳурии Тоҷикистон ба Маҷлиси Олӣ, ки 21 декабр ироа гардид, вохӯрии Абдулло Раҳмонзода, раиси Кумитаи кор бо ҷавонон ва варзиши назди Ҳукумати кишвар бо устодону донишҷӯёни ин муассисаи олии таълимӣ доир гардид.

Абдулло Раҳмонзода, раиси Кумитаи кор бо ҷавонон ва варзиш зимни баромади хеш таъкид намуд, ки ҷавонон дар рушди давлатдорӣ ва обод гардонидани кишварамон саҳми арзанда доранд. Ҳамин аст, ки дар Паёми ахири хеш Президенти кишвар муҳтарам Эмомалӣ Раҳмон аз саҳми ҷавонон дар рушди соҳаҳои гуногуни ҷумҳурӣ ёдовар шуда, ба онҳо ҳамчун дӯст доир ба донишандӯзияшон муроҷиат намуданд.

Гуфта шуд, ки Пешвои миллат зимни Паём аз ҷумла иброз доштанд, ки “Ман ба ҷавонон ҳамчун падар, дӯст таъкид мекунам, ки ба илм, ҳунар, дониш, касб ва омӯхтани забонҳои хориҷи рӯ оваред!”. Худи ҳамин таъкиди Роҳбари давлат худ далели он аст, ки роҳбарияти олии мамлакат ҳамеша ба ҷавонон таваҷҷуҳи махсус зоҳир менамоянду ҷиҳати соҳибкасбу соҳибдониш шудани онҳо тамоми имкониятҳои заруриро муҳайё месозанд.

Дар охир таъкид гардид, ки бояд бо истифода аз имкониятҳои мавҷуда ҷавонон сидқан илму дониш омӯзанду бо аз бар кардани касбҳои гуногун дар пешрафти меҳан саҳми арзандаи худро гузоранд.

С. ШАРИПОВА, “ҶТ”